प्रवक्ता शेर्पाका अनुसार खुम्बु क्षेत्रको खरिखोला प्रवेश गर्नासाथ यात्रुले व्यक्तिगत रूपमा नतिरे सवारीधनीले एकमुष्ट रूपमा सबै यात्रुको शुल्क गाउँ प्रहरी पोस्टमा बुझाउनुपर्नेछ । सडक मर्मत सम्भारका लागि भन्दै यात्रुबाट सेवा शुल्क उठाउन थालेपछि आलोचना पनि भएको छ । वडाध्यक्ष र अन्य सरोकारवालाले पालिकाको कदमको विरोध गरेका छन् । वडा १ का अध्यक्ष फुनुरु शेर्पाले पालिकाले यात्रुबाट शुल्क उठाउनु गलत रहेको टिप्पणी गरे । कोशी प्रदेशसभा सदस्य गोम्बु शेर्पाले राज्यकै लगानीबाट बनेको सडकमा निजी कम्पनीले सडक बनाए जसरी यात्रुबाट शुल्क उठाउन नमिल्ने बताए ।

गाउँपालिकाले यसअघिदेखि नै खुम्बु क्षेत्र प्रवेश गर्ने विदेशी पर्यटकबाट पनि २ हजार रुपैयाँका दरले पर्यटन शुल्क उठाउँदै आएको छ । खुम्बु पासाङल्हामु पालिकाभरि २५ किलोमिटर मात्रै सडक छ । वडा १ खरिखोलादेखि सुर्केसम्म मात्रै सवारीसाधन सञ्चालन भइरहेका छन् । यो सडक गाउँपालिका र लुक्लापारि निर्माणाधीन जलविद्युत् आयोजनाको प्रवर्द्धक कम्पनी सिल्क पावर प्रालिको लगानीमा हालै निर्माण गरिएको हो ।