संखुवासभा — चीन, नेपाल र भारत जोड्ने  राष्ट्रिय गौरवको जोगवनी-किमाथांका सडक 'ब्रेक थ्रु' भएको छ । चीन र भारत जोड्ने खाँदवारी-किमाथांका सडक छिचोलिएपछि सञ्जालमा जोडिएको हो ।

नेपाली सेनाले चट्टानी भीर फुटाइसकेपछि कोशी राजमार्गअन्तर्गतको खाँदबारी-किमाथांका सडकको च्याम्तांग-घोङघोप्पा खण्डको साढे १० किलोमिटर सडक पूरा भएको ऊर्जामन्त्री दीपक खड्काले बताए ।

ऊर्जामन्त्री खड्काका साथ भौतिक पूर्वाधार तथा यातायात मन्त्री देवेन्द्र दाहाल र रक्षामन्त्री मानवीर राई, पूर्वसांसद राजेन्द्र गौतमसमेतको टोली घोङघोप्पा पुगेर 'ब्रेक थ्रु' गरेका हुन्। यससँगै सडकको स्तरोन्नति र चौडा बनाउने काम गरिने उनले बताए ।

यो खण्डमा सेनाले डबल ल्याण्डको १० दशमलव ५ किलोमिटर सडक निर्माण पूरा गरिसकेको छ । यता सदरमुकाम खाँदबारीबाट च्याम्तांगसम्मको १ सय ३४ किलोमिटर सडक निर्माण भइसकेको छ । यसअघि नै किमाथांकाबाट घोङघोप्पासम्म १४ किमि सडकको कच्ची ट्याक खुलिसकेको थियो ।  खाँदबारी-किमाथांका सडकको दूरी १ सय ५८ किलोमिटर रहेको उत्तर दक्षिण कोशी सडक योजनाले जनाएको छ ।