खोटाङ — ज्येष्ठ नागरिक तथा अशक्त र अपांगता भएका लाभग्राहीहरूलाई लक्षित गरी साकेला गाउँपालिकाले वडा–वडामै शिविर सञ्चालनमार्फत सामाजिक सुरक्षा भत्ता वितरण सुरु गरेको छ । दोस्रो त्रैमासिक रकम वडा–वडामा पुगेर गत आइतबारबाट वितरण सुरु गरेको हो ।
शिविर गाउँपालिका, नेपाल एसबीआई बैंक र नेपाल प्रहरीको संयुक्त टोली खटिएर वितरण सुरु गरिएको गाउँपालिका अध्यक्ष रविप्रकाश राईले बताए । भौगोलिक विकटता र शारीरिक रूपमा अशक्तताका कारण बैंकसम्म पुगेर भत्ता लिन नसक्नेहरूलाई लक्षित गरी शिविर आयोजना गरिएको उनले जनाए । ‘वृद्धवृद्धा, हिँड्डुल गर्न नसक्नेहरूलाई वडा–वडामै पुगेर शिविरमार्फत सामाजिक सुरक्षाभत्ता वितरण गरिएको हो,’ उनले भने ।
शिविरको पहिलो दिन गाउँपालिकाको वडा नम्बर २ रतन्छाको वडा कार्यालयमा आयोजित शिविरमा एक सय ८ जना लाभग्राहीलाई १३ लाख २१ हजार रकम वितरण गरिएको छ ।
शिविरको दोस्रो दिन सोमबार वडा नं १ बाँझेच्यानडाँडास्थित वडा कार्यालय भवनमा आयोजना गरिएको शिविरमा ७५ जना लाभग्राहीहरुलाई आठ लाख ८२ हजार भत्ता रकम वितरण गरिएको नेपाल एसबीआई बैंकका प्रतिनिधि अनिलकुमार महतोले बताए ।
तेस्रो दिन मंगलबार पनि वडा नं १ बाँझेच्यानडाँडाको डाँडागाउँस्थित चण्डेश्वरी आधारभूत विद्यालय शिविर सञ्चालन गरिएको सामाजिक सुरक्षा शाखाका संयोजक डिएम चाम्लिङले बताए । पुस २४ गते गाउँपालिका–३ खिदिमाको वडा कार्यालयमा, पुस २५ गते ४ मात्तिमको वडा कार्यालयमा र शिविरको अन्तिम दिन पुस २६ गते ५ मात्तिमबिर्तास्थित वडा कार्यालयमा सामाजिक सुरक्षा भत्ता वितरण गरिने चाम्लिङले बताए ।
गाउँपालिकामा चालु आर्थिक वर्षको दोस्रो त्रैमासिकमा एक हजार तीन सय ३३ जना लाभग्राहीका लागि एक करोड ३४ लाख रूपैयाँ निकासा गरिएको चाम्लिङले सुनाए । ‘साकेलामा एक हजार तीन सय ३३ जना सामाजिक सुरक्षा भत्ता पाउने लाभग्राही हुनुहुन्छ,’ चाम्लिङले भने, ‘उहाँहरूका लागि एक करोड ३४ लाख रूपैयाँ निकासा गरेका छौं ।’
