खोटाङ — खोटाङ र उदयपुरको सिमाना फोक्सिङटारस्थित सुनकोशी नदीमा बेलिब्रिज जडानको काम धमाधम भइरहेको छ । सगरमाथा लोकमार्ग अन्तर्गत फोक्सिङटारमा असोज १२ गतेको बाढीले पुल बगाएपछि उक्त ठाउँमा बेलिब्रिज जडान सुरु गरिएको हो ।
उक्त बेलिब्रिजले खोटेहाङ गाउँपालिका–९ लिच्कीराम्चे र उदयपुरको रौतामाई गाउँपालिका–६ आँपटार जोड्छ । उक्त ठाउँमा ५० मिटरको बेलिब्रिज जडान हुनेछ । एक करोड २९ लाख ४६ हजार ७७ रूपैयाँको लागतमा पुसभित्र बेलिब्रिज निर्माण सम्पन्न गर्ने गरी आर्यन कन्ट्रक्सन मल्टिपर्पोज प्रालि उदयपुर कटारीले मंसिर २८ गते सम्झौता गरेको थियो ।
सम्झौता अवधिमै काम सकेर यातायात सञ्चालन गरिने कोशी प्रदेश भौतिक पूर्वाधार तथा स्वास्थ्य मन्त्री भूपेन्द्र राईले बताए । पुलको काम सम्पन्न भइनसक्दै पुल बगाएकाले त्यही निर्माण कम्पनीलाई दिने वा नयाँ प्रक्रियामा जाने भन्नेबारेमा पनि छलफल भइरहेको राईले बताए । ‘बेलामै काम सकेर यातायात सञ्चालन गरिने छ,’ मन्त्री राईले भने, ‘बेलिब्रिजका साथै खोटाङलाई लागेको प्राकृतिक नाकाबन्दी तोड्ने गरी स्थायी रूपमा समस्या समाधान हुन्छ ।’
