मुम्बई — अलिकति विवाद । अलिकति अन्योल । दक्षिण एसियाको भूराजनीतिले पारेको गम्भीर प्रभावबीच ट्वान्टी–२० विश्वकप क्रिकेट शनिबार सुरु हुँदै । पाकिस्तानले भारतविरुद्ध कोलम्बोमा हुने खेल साँच्चै बहिष्कार गर्छ वा गर्दैन भन्ने अन्योल अझै कायम छ ।

पाकिस्तानी क्रिकेट बोर्डले अहिलेसम्म खेल्दैनौं पनि भनेको छैन । पाकिस्तानी सरकारले भनेको हो, आफ्नो टिमले खेल्दैन भनेर । श्रीलंका क्रिकेटले पाकिस्तानलाई आफ्नो बहिष्कारको घोषणा फेर्न अनुरोध गरिरहेको छ । 

त्यसअघि बंगलादेश प्रतियोगिताबाट बाहिरिएको थियो । सुरक्षाको कारण देखाएर भारतमा नखेल्ने भनेपछि विवाद त्यहींबाट सुरु भएको हो । जतिबेला कोलम्बोमा पाकिस्तान र नेदरल्यान्ड्सबीच उद्घाटन खेल सुरु हुनेछ, त्यतिबेला भने प्रतियोगिताले औपचारिक सुरुआत पाउनेछ । प्रतियोगितामा उपाधिका लागि बलियो टिम फेरि एकपल्ट भारत नै छ, त्यसमाथि भारत डिफेन्डिङ च्याम्पियन हो । कप्तान सूर्यकुमार यादवले भनिसकेका छन्, आफ्नो टिम ‘विनिङ मेन्टालिटी’ ले भरिएको छ भनेर । 

उनले भनेका छन्, ‘पहिले र अहिलेको भारतीय टिम उही हो, सोच्ने तरिका मात्र फेरिएको छ । अचेल हामी जित्ने मानसिकताले खेल्छौं र त्यसलाई इन्डियन मेन्टालिटी भने हुन्छ ।’ समूह ‘ए’ बाट भारत सजिलै सुपर एट पुग्ने विश्वास गरिएको छ अनि उपाधि रक्षाका लागि बलियो प्रत्याशी पनि । यो समूहमा भारतसँगै पाकिस्तानलाई कुनै एक टिमले चुनौती दिन सक्छ भने त्यो अमेरिका हुनेछ । सन् २०२४ मा अमेरिकाले पाकिस्तानलाई हराएको कमैले मात्र बिर्सेका छन् । 

शनिबार नै भारत र अमेरिका पनि भिड्ने छन् । उपाधिका लागि दुई पूर्वविजेता अस्ट्रेलिया र इंग्ल्यान्ड पनि उपाधिका लागि उत्तिकै उपाधिका सम्भावित बलिया विजेता हुन् । भारतलाई लगातार दोस्रोपल्ट उपाधि जित्नबाट कसैले रोक्न सक्छ भने यिनै दुई टिम प्रतिद्वन्द्वी हुनेछन् । सन् २०२१ को विजेता अस्ट्रेलियालाई प्रतियोगिता अगाडि नै एउटा ठूलो धक्का भने लागेको छ । त्यो हो, ढाडको चोटका कारण तीव्र गतिका बलर प्याट कमिन्सलाई गुमाउनु । त्यति मात्र होइन, टिममा अर्का तीव्र बलर जोस हेजलउड हुने छैनन्, उनी पनि चोटग्रस्त छन् । 

यसपल्ट अस्ट्रेलिया मिचेल मार्सको कप्तानीमा खेल्दै छ । टिम समूह ‘बी’ मा छ । टोलीको पहिलो खेल आयरल्यान्डविरुद्ध हुनेछ । शनिबार नै कोलकातामा वेस्ट इन्डिज र स्कटल्यान्ड भिड्ने छन् । यो समूह ‘सी’ को पहिलो खेल हुनेछ । यो समूहमा बलियो टिम ह्यारी ब्रुक्स नेतृत्वको इंग्ल्यान्ड हो । यति बेला इंग्लिस मिडियामा ब्रुक्सको चर्को आलोचना भइरहेको छ ।

तर उनले यस्ता अखबारी पण्डित्याइँमा कुनै रुचि नभएको पनि बताएका छन् । यसै साता मात्र इंग्ल्यान्डले श्रीलंकाविरुद्ध ट्वान्टी–२० सिरिज ३–० ले जितेको छ । वेस्ट इन्डिज पनि पूर्वविजेता रहेको हुनाले यो समूहमा दुई पुराना च्याम्पियन छन् । वेस्ट इन्डिज पनि इंग्ल्यान्ड र भारतपछि ट्वान्टी–२० उपाधि दुईपल्ट जित्ने टिममा पर्छ । यो समूहमा नेपालसँगै इटाली र बंगलादेशको स्थानमा एकाएक मौका पाएको स्कटल्यान्ड छ । जोस बटलरले छाडेयता ब्रुक्सको नेतृत्वमा इंग्ल्यान्डले पहिलो ठूलो प्रतियोगिता खेलिरहेको छ ।