नेपाली टोलीका एक खेलाडी तेस्रो, नौ खेलाडी दोस्रो र पाँच खेलाडी पहिलो पटक ट्वान्टी–२० विश्वकप खेल्दै
काठमाडौँ — ट्वान्टी–२० विश्वकप क्रिकेट शनिबार सुरु हुँदै । भारत र श्रीलंकामा हुने यो विश्वकपमा नेपाल पनि सहभागी हुँदैछ । नेपालले खेल्न लागेको यो तेस्रो विश्वकप हो ।
रोहितकुमार पौडेल
विश्वकप सहभागिता : दोस्रो
नवलपरासीको बर्दघाटबाट क्रिकेट खेलाडी बन्ने चाहनासहित काठमाडौं आइपुगेका रोहितको यात्रा बालुवाटार क्रिकेट ट्रेनिङ सेन्टरमा प्रशिक्षण लिएपछि सुरु हुन्छ ।
उनी नेपालको यू–१९ टोली हुँदै राष्ट्रिय क्रिकेट टोलीमा पुगेका हुन् । पछिल्लो ३ वर्षदेखि उनी नेपालको नियमित कप्तान छन् ।
रोहितको कप्तानीमा नेपालले दोस्रो पटक विश्वकप खेल्नेछ । उनकै कप्तानीमा नेपालले पहिलो पटक एसिया कप पनि खेलेको थियो ।
कुशल भुर्तेल
विश्वकप सहभागिता : दोस्रो
कुशल भुर्तेल मिडियम पेस बलिङ अलराउन्डरको रूपमा अन्तर्राष्ट्रिय क्रिकेटमा आएका थिए ।
सौरभ खनाल घाइते भएपछि उनको विकल्पमा राखिएपछि कुशलले बंगलादेशमा सन् २०१६ मा भएको आईसीसी यू–१९ विश्वकप खेल्न पाएका थिए ।
मध्यक्रमबाट ब्याटिङ गर्दै आएका रूपन्देहीका उनलाई २०२१ मा अस्ट्रेलियाली प्रशिक्षक डेव ह्वाटमोरले डेब्यु गराएका थिए । त्यसयता उनी नेपाली टोलीमा आक्रामक ब्याटरको रूपमा स्थापित छन् ।
आसिफ शेख 
विश्वकप सहभागिता : दोस्रो
सन् २०१६ मा भएको नेपाल प्रिमियर लिगमा पञ्चकन्या तेजबाट अर्धशतक बनाएपछि आसिफ नेपाली क्रिकेटमा देखिएका थिए ।
घरेलु क्रिकेटमा एकपछि अर्को राम्रो प्रदर्शनले उनलाई २०२१ मा नेपाली राष्ट्रिय टोलीबाट ‘डेब्यु’ गर्ने अवसर प्रदान गरेको थियो ।
संयमित भएर खेल्ने उनको स्वभाव छ र नेपाली ब्याटिङ इनिङ्स लामो तान्नु उनको विशेषता हो ।
दीपेन्द्रसिंह ऐरी 
विश्वकप सहभागिता : दोस्रो
दीपेन्द्र बंगलादेशमा सन् २०१६ मा भएको आईसीसी यू–१९ विश्वकपबाट अगाडि आएका खेलाडी हुन् ।
त्यसको अर्को वर्ष उनले केन्याविरुद्ध विश्व क्रिकेट लिग च्याम्पियनसिपको खेलमा राष्ट्रिय टोलीबाट कीर्तिपुरमा ‘डेब्यु’ गरेका थिए । पहिला उनी मिडियम पेस अलराउन्डर थिए ।
तर ढाडमा समस्या आएपछि उनी अफ स्पिनर बने । जसले उनलाई ट्वान्टी–२० अन्तर्राष्ट्रियको अलराउन्डर वरीयतामा दोस्रो स्थानमा पुर्याएको थियो । उनले ९ बलमा अर्धशतक बनाएर ट्वान्टी–२० अन्तर्राष्ट्रियमा अजेय कीर्तिमान पनि बनाएका छन् ।
सन्दीप जोरा 
विश्वकप सहभागिता : दोस्रो
महेन्द्रनगर कञ्चनपुरका जोरा एक समयका सबैभन्दा कम उमेरमा ट्वान्टी–२० अन्तर्राष्ट्रियमा अर्धशतक बनाउने खेलाडी हुन् ।
उनले सन् २०१९ मा यूएईविरुद्ध ४६ बलमा ५३ रन बनाएका थिए । यो उपलब्धि उनले १७ वर्ष १ सय ३ दिनको उमेरमा हात पारेका थिए ।
यो उनको ट्वान्टी–२० अन्तर्राष्ट्रियमा ‘डेब्यु’ खेल पनि थियो । उनको प्रदर्शनमा एकरुपको रफ्तार नभए पनि अगस्टमा वेस्ट इन्डिजविरुद्धको दोस्रो ट्वान्टी–२० अन्तर्राष्ट्रियमा उनले ६३ रन बनाएका थिए ।
आरिफ शेख 
विश्वकप सहभागिता : पहिलो
आरिफ नेपाली टोलीका सबैभन्दा अनुभवी खेलाडी हुन् । उनी २०१४ यता नेपाली टोलीमा छन् ।
दुई वर्षअघि चर्को प्रतिस्पर्धामा विश्वकप टोलीबाट आरिफ बाहिरिएका थिए ।
यसपटक भने उनी विश्वकपमा स्थान बनाउन सफल भएका छन् र पहिलो पटक विश्वकपमा उत्रने दाउमा छन् ।
मध्यक्रममा जमेर खेल्नु उनको विशेषता हो । स्टुवार्ट ल प्रशिक्षक भएर आएयता उनी नेपालको मध्यक्रमको ब्याटिङमा खम्बा भएर उभिएका छन् ।
सोमपाल कामी 
विश्वकप सहभागिता : तेस्रो
आफ्नो परिवारसँग भारतको पन्जाबमा रहेका सोमपाल सन् २०१३ मा नेपाल क्रिकेट फ्यान क्लबको सहयोगमा क्रिकेट खेल्न स्वदेश फर्किएका थिए ।
सन् २०१४ को जनवरीमा न्युजिल्यान्डमा भएको विश्वकप छनोटबाट उनले नेपाली टोलीमा ‘डेब्यु’ गरेका थिए ।
त्यसयता उनी निरन्तर खेल्दै आएका छन् । उनी नेपालले खेलेका तीनै विश्वकप खेल्ने एक्लो खेलाडी हुन् ।
गुलशन झा 
विश्वकप सहभागिता : दोस्रो
डेव ह्वाटमोरले डेब्यु गराएका अर्का खेलाडी हुन्, गुलशन झा । अलरान्डर उनको खुबी हो ।
विशेषगरी देव्रे हाते ब्याटिङ कारण उनले नेपाली टोलीमा जग बनाएर बसेका छन् ।
सर्लाहीबाट सुरु भएको उनको यात्रा नेपाल पुलिस क्लबमा गएर निखारिएको थियो ।
सन् २०२२ मा ओमान विश्वकप लिग–२ मा नेपाली टिमबाट आफ्नो डेब्यु गरेका थिए ।
लोकेश बम 
विश्वकप सहभागिता : पहिलो
सन् २०२२ मा घरेलु प्रतियोगिता प्रधानमन्त्री कपमा अन्तिम तीन ओभर ब्याटिङ गर्दा अर्धशतक बनाएपछि लोकेश चर्चामा माएका हुन् ।
दुई वर्षअगाडि उनले आयरल्यान्ड ‘ए’ विरुद्ध शतक प्रहार गरेका थिए ।
पछिल्लो तीन वर्षमा नेपालबाट ट्वान्टी–२० मा शतक प्रहार गर्ने उनी एक्ला खेलाडी हुन् । उनी नेपाली टोलीका दोस्रो रोजाइका विकेटकिपर पनि हुन् ।
बसिर अहमद 
विश्वकप सहभागिता : पहिलो
देव्रेहाते स्पिन अलराउन्डर हुन्, बसिर अहमद । नेपाल प्रिमियर लिगमा उनले ब्याटिङबाट पनि प्रभाव देखाएपछि पहिलो पटक विश्वकप खेल्ने अवसर पाएका हुन् ।
कपिलवस्तुबाट आएका उनलाई गत वर्ष हङकङमा भएको चारदेशीय प्रतियोगिताको फाइनलमा खेलेको इनिङ्स कारण विशेष याद गरिन्छ ।
उनले ४३ बलमा ८० रन बनाए पनि नेपाल तीन रनले चुकेको थियो ।
करण केसी 
विश्वकप सहभागिता : दोस्रो
भारतबाट सन् २०१४ मा नेपाल फर्केपछि करणको खेल यात्रा सुरु भएको थियो ।
उनी नेपाली टोलीका तीव्र गतिका बलर हुन् । तर ब्याटिङमा उनको नेपाली टोलीबाट सबैभन्दा उच्च स्ट्राइक रेट रहेको छ ।
ट्वान्टी–२० क्रिकेटमा उनको बलिङ अझ प्रभावकारी छ । सय विकेट पार गर्ने उनी नेपालका केवल दोस्रो बलर हुन् ।
सन्दीप लामिछाने 
विश्वकप सहभागिता : दोस्रो
लेग स्पिनका हस्ती हुन्, सन्दीप लामिछाने । चितवनबाट सुरु भएको उनको क्रिकेट यात्रालाई पुबुदु दसानायेकेले नेपाली टिमसम्म पुर्याएका थिए ।
त्यसयता उनी नेपालबाट सबै संरचनामा सर्वाधिक विकेट लिने खेलाडी हुन् ।
उनीसँग इन्डियन प्रिमियर लिग, बिगबास, क्यारेबियन प्रिमियर लिग, बंगलादेश प्रिमियर लिगलगायत विश्व क्रिकेटमा खेलेको ठूलो अनुभव रहेको छ ।
नन्दन यादव 
विश्वकप सहभागिता : पहिलो
उमेर समूहमा नेपालबाट अन्तर्राष्ट्रिय क्रिकेट खेले पनि नन्दन यादव उच्च शिक्षाका लागि अस्टेलिया गएका थिए ।
गत वर्ष नेपाल प्रिमियर लिग खेल्न आएपछि उनी पुनः अस्ट्रेलिया गएनन् । त्यसयता उनी निरन्तर नेपाली टिमबाट खेल्दै आएका छन् ।
यदि क्रममा उनले एकदिवसीय र ट्वान्टी–२० मा डेब्यु पनि गरेका थिए ।
ललित राजवंशी 
विश्वकप सहभागिता : दोस्रो
देव्रे हाते स्पिनर ललित राजवंशी घरेलु क्रिकेटमा सबैभन्दा सफल बलर हुन् ।
तर राष्ट्रिय टोलीमा नियमित मौका नपाउँदा उनले त्यसअनुरुप निखारिएको प्रदर्शन दिन सकेका छैनन् ।
उनले ४१ एकदिवसीय खेलमा ४७ विकेट र ३७ अन्तर्राष्ट्रिय ट्वान्टी–२० क्रिकेटमा ३६ विकेट लिएका छन् ।
शेर मल्ल
विश्वकप सहभागिता : पहिलो
नेपाल प्रिमियर लिगका दुवै संस्करण जित्ने उनी एक्ला खेलाडी हुन्, शेर मल्ल ।
यी अफ ब्रेक अलराउन्डर यस सिजनको एनपीएलमा चर्चामा थिए । उनले संयुक्त रूपमा सर्वाधिक १७ विकेट लिए ।
त्यतिमात्र होइन, उनले नेपाली राष्ट्रिय टोलीको ढोका खोल्दै विश्वकप खेल्न मुम्बई आइपुगेका थिए ।
