रास्कोट, कालीकोट — जिल्लाकै जेठो विद्यालय बडिमालिका माविले पुस पहिलो साता धुमधामसँग स्थापना दिवस मनायो । गुणस्तरीय पढाइ खोज्दै सहर चहार्ने अभिभावक र विद्यार्थीका लागि विद्यालयले रुचिअनुसार शिक्षा दिन थालेको प्रधानाध्यापक पुष्पराज बरालले बताए ।

बालविकास केन्द्रदेखि १२ कक्षासम्म ९ सय ६० विद्यार्थी पढ्छन् ।  छात्रा ५ सय ३७ र छात्र ४ सय २३ छन् भने दलित बालबालिकाको संख्या २ सय ३५ छ ।

स्थानीय रास्कोट नगरपालिकाले सामुदायिक विद्यालय सुधार गर्ने नीति बनाएपछि बसाइँसराइ नै रोकिएको नगर प्रमुख धर्मराज शाहीले बताए । ‘गाउँ खाली हुने अवस्था आयो,’ उनले भने, ‘बडिमालिका माविबाट अंग्रेजी माध्यममा पनि पठनपाठन थाल्यौं । विद्यार्थी यतै भर्ना हुन थालेका छन् ।’

नगर शिक्षा शाखा प्रमुख खेमराज शाहीका अनुसार नगरले सामुदायिक सुधारका लागि अनुदानसमेत दिने गरेको छ । 

तत्कालीन राष्ट्रिय पञ्चायत सदस्य धर्मदत्त उपाध्यायको अगुवाइमा २०३२ मा मावि स्वीकृत भएको विद्यालय २०१३ अघि गौतुकोटमा गुरुकुलका रूपमा थियो । नेपाल राष्ट्रिय प्राविका रूपमा रहेर २०१८ देखि शम्भुनाथ मिडिल स्कुल सिमसेरामा सञ्चालन गरियो । 

शिक्षाप्रेमी एवं राजनीतिज्ञ उपाध्यायसहित स्थानीय समाजसेवी जगतबहादुर शाही, पृथ्वीबहादुर शाही र गिरिराज शाहीले जग्गा दान गरे ।  श्रमदान, मुठीदान र चन्दा दिएर विद्यालय सञ्चालन गरेको विद्यालय सञ्चालनमा सक्रियमध्येका ८१ वर्षीय सत्यबहादुर शाहीले बताए । उनका अनुसार विद्यालयमा पढ्न अछाम, बाजुरा, मुगु, कालीकोटबाट सामल (दाल, चामल, पिठो, नुन, तेल) बोकेर विद्यार्थी शिक्षा लिन रास्कोट आउँथे । पिठ्यूँमा भारी बोकेर तीन/चार दिन हिँड्नुपर्थ्यो ।