जुम्ला — पातारासी गाउँपालिका–४ का लुमगाउँका नवीन रेउले देवदह मेडिकल कलेज रूपन्देहीमा चिकित्सा शिक्षा चौथो वर्षमा अध्ययनरत छन् । उनलाई पातारासीले ७५ प्रतिशत अनुदानमा चिकित्सा शिक्षा अध्ययनको व्यवस्था मिलाइदिएको हो ।

घरको आर्थिक अवस्था कमजोर भएका नवीनले एमबीबीएसमा नाम निकालेपछि पालिकाले हरेक वर्ष ७ लाख रुपैयाँ बेहोरिरहेको छ । देवदह कलेजबाट नाम निकाल्ने उनी एक्ला हुन् । अबको डेढ वर्षपछि नवीन डाक्टर बन्नेछन् । पालिकाले मेडिकल अधिकृत निःशुल्क अध्ययन कार्यविधि बनाएर डाक्टर पढाइरहेको छ ।

डेढ वर्षदेखि पातारासी–७ का मनोज थापा पनि जानकी मेडिकल कलेज धनुषामा एमबीबीएस अध्ययन गरिरहेका छन् । ‘पारिवारिक आर्थिक अवस्था नाजुक भएकाहरूलाई इच्छा हुँदाहुँदै पनि डाक्टर पढ्ने अवस्था कठिन हुन सक्थ्यो,’ पातारासी गाउँपालिकाका स्वास्थ्य शाखा प्रमुख रतन बुढ्थापाले भने, ‘तर पालिकाको आर्थिक सहयोगका कारण यहाँका विद्यार्थीको डाक्टर बन्ने सपना साकार भइरहेको छ ।’ उनले केही वर्षमै पातारासीबाट दुई जना एमबीबीएस डाक्टर बन्नेमा खुसी छन् ।

पातारासी गाउँपालिकाले न्यूनतम ५ जना डाक्टर उत्पादन गर्ने लक्ष्य राखेको थियो । तर आन्तरिक स्रोत अभावले एमबीबीएस पढाउने काम रोक्न सक्ने देखिएको छ । शाखा प्रमुख बुढ्थापाले भने, ‘पालिका त धेरैलाई डाक्टर बनाउन चाहन्छ तर आन्तरिक स्रोतको कमीले अब थप एक जनालाई मात्र पढाउन सक्ने अवस्था छ ।’ नवीन र मनोजका लागि पालिकाले अहिले वार्षिक ७/७ लाख रुपैयाँ बेहोर्दै आइरहेको छ ।