नहोस् नयाँ दिनको आगमन हाँगा–हाँगामा बसेर सुरिलो स्वरमा गीत नगाऊ नचिरबिराऊ ए चराचुरूंगीहरुसरकार सुतिरहेको छ !
नजन्मियोस् नयाँ सौन्दर्य
नफुलोस् एउटै पनि फूल
कोपिला फूल बनेर नमगमगाऊ
आउनेछन् हल्ला गर्दै
हूलका हूल भमरा
सरकार सुतिरहेको छ !
खुसीमा नचिच्याऊ पटक्कै
नहोस् जीवनमा कुनै रमाइलो पनि
हर्षोल्लास मनाउँदै,
नाचगान गर्दै
नबग ओरालो ए खोलाहरु
सरकार सुतिरहेको छ !
ननिस्कियोस् कुनै मीठो धुन
नउडोस् बादल, नचलोस् हावा
ए वर्षात् तिमी रिमझिम
गर्दै नझर
हुनुहुँदैन कुनै होहल्ला
सरकार सुतिरहेको छ !
नचम्किए नचम्कियोस् जून
नउदाए नउदाओस् घाम
नटिलपिलाए नटिलपिलाऊन् ताराहरु
ए बतास !
गीत गाउँदै नडुल भीरपहरा
सरकार सुतिरहेको छ !
नथालियोस् उमंगको यात्रा
नहिँड नयाँ जोसमा
ए खुट्टाहरु
यी सहस्र पदचापले
भंग हुनेछ वातावरणको मौनता
सरकार सुतिरहेको छ !
सरकार सुतिरहको छ साथी
बस तिमी पनि चुपचाप !
