कालीकोट — पेस्की नपाएको भन्दै महाबै गाउँपालिकाका प्रमुख प्रशासकीय अधिकृत शिवराज कोइरालामाथि कुटपिट भएको छ । 

गाउँपालिकाको प्रशासनिक भवन निर्माणबापतको भुक्तानी नदिएको भन्दै निर्माण ब्यवसायीका प्रतिनिधि महाबै–४ का ३१ वर्षीय यज्ञराज शाहीले शुक्रबार बिहान ८ बजेतरि प्रमुख प्रशासकीय अधिकृत कोइरालामाथि कुटपिट गरेका हुन् । 

सर्भर नचलेर भुक्तानीको काम नभएपछि गाउँपालिकाकै भवन निर्माणको जिम्मा लिएको ठेकेदारका प्रतिनिधि शाहीले प्रमुख प्रशासकीय अधिकृतलाई कुटपिट गरेको कालीकोटका प्रहरी प्रमुख डिएसपी हिमबहादुर खत्रीले बताए । बिहीबार अबेरसम्म कार्यालयमा भुक्तानीको काम गरेर बिहान कोठामै सुतिरहेका बेला काम छ भन्दै ढोका खोल्न लगाएर कुटपिट गरेको डिएसपी खत्रीले बताए । कुटपिट गरेर भागेका शाहीलाई प्रहरीले फेला पार्न नसकेको उनले बताए ।  

गाउँपालिकाको आर्थिक वर्षको अन्त्यमा सबै भुक्तानीको काम सकेर आफ्नै कोठामा बसिरहेका प्रमुख प्रशासकीय अधिकृतमाथि कुटपिट गर्ने ठेकेदारका प्रतिनिधिलाई कारवाहीको माग गर्दै गाउँपालिकाका जनप्रतिनिधि र कर्मचारीले छुट्टाछुट्टै विज्ञप्ती निकालेका छन् । 

गाउँपालिका अध्यक्ष खेमबहादुर सिंह, उपाध्यक्ष दानसिंह सेजुवाल, सबै वडाका अध्यक्षसहित कार्यपालिका सदस्यले हस्ताक्षर गरेको विज्ञप्तीमा अनावश्यक विषयलाई लिएर प्रमुख प्रशासकीय अधिकृतमाथि आक्रमण गर्नु निन्दनीय कार्यभन्दै दोषीलाई कारवाही गर्नुपर्ने माग गरिएको छ । ‘असार मसान्तमा भुक्तानीका सम्पूर्ण काम सानदाररुपमा सकेर आफ्नो कोठामा आराम गरिरहेका कार्यालय प्रमुखमाथिको आक्रमण निन्दनीय छ’ विज्ञप्तीमा भनिएको छ ।   

गाउँपालिकामा कार्यरत सबै कर्मचारीहरु पनि प्रमुख प्रशासकीय अधिकृतमाथि कुटपिट गर्नेलाई कडा कारवाहीको माग गर्दै सम्पूण सेवा बन्द गरेर आन्दोलित भएका छन् । प्रमुख प्रशासकीय अधिकृत कोइराला गाउँमा असुरक्षित भएको जनाउँदै शुक्रबार बिहान महाबैबाट सदरमुकाम मान्म हिँडेका छन् । सदरमुकाम मान्मबाट करिब ४० किलोमिटर पश्चिम दक्षिणमा पर्ने पर्ने महाबै सडक सञ्जालसँग जोडिन नसकेको गाउँपालिका हो । सेरावाडासम्म कर्णाली राजमार्ग हुँदै गएर पैदल २ घण्टा हिँडेपछि गाउँपालिकाको केन्द्र पादमघाट पुगिन्छ ।