सुर्खेत — दैलेखको चामुण्डाबिन्द्रासैनी नगरपालिका–७ सांगेतडा (चिसापानी)बाट कर्णाली नदीमा खसेको गाडी १० घण्टा बित्दासमेत भेटिएको छैन । 

सुर्खेतको वीरेन्द्रनगरबाट कालीकोटको रास्कोट जाँदै गरेको कर्णाली प्रदेश–०२–००१ ख १०५५ नम्बरको फोर्स गाडी बिहीबार बिहान करिब साढे ११ बजे कर्णाली नदीमा खसेको थियो । सुर्खेत बसपार्कबाट ५ जना यात्रु बोकेर छुटेको गाडीमा कतिजना सवार थिए भन्नेबारे एकीन हुन नसकेको कर्णाली प्रदेश प्रहरी कार्यालयले जनाएको छ । नदीमा जलसतह बढेको र गाडी डुबेकाले उद्धार कार्यमा कठिनाइ भएको प्रहरीले जनाएको छ । कार्यालयका अनुसार घटनास्थलमा एक जनाको मृत्यु भएको छ भने अन्य सबै यात्रु बेपत्ता छन् । 

भीरमा अड्किएको अवस्थामा एक जनाको शव निकालिए पनि उनको सनाखत हुन नसकेको प्रदेश प्रहरी प्रवक्ता एसएसपी सन्तोषसिंह राठौरले बताए । उनका अनुसार दुर्घटनामा परेको गाडी बुलबुले यातायात प्रालिको हो । ‘गाडी अनियन्त्रित भई झण्डै ४ सय मिटर तलको कर्णालीमा खसेको छ, दुर्घटनाको कारण केही खुलेको छैन,’ उनले भने, ‘केही यात्रु बिच बाटोबाट चढेको पनि जानकारी भयो, तर कति यात्रु थिए एकीन भएको छैन, नदीमा पानीको सतह बढिरहेको छ, पानी धमिलो भएकाले गाडी नै नदेखिँदा उद्धारमा कठिनाइ देखियो ।’ उनका अनुसार सशस्त्र प्रहरीको महेश्वर बाहिनीबाट गोताखोरको टोलीलाई पनि घटनास्थलमा परिचालन गरिएको छ ।