सुर्खेत — कर्णालीका १० वटै जिल्लामा राष्ट्रिय स्वतन्त्र पार्टी (रास्वपा) को अधिवेशन चलिरहेको छ । पार्टीको अधिवेशनमार्फत सुर्खेत, हुम्ला, कालीकोट र सल्यानमा सर्वसम्मत नेतृत्व चयन भएको छ भने अन्य जिल्लामा निर्वाचन र सर्वसम्मतिको प्रयासमार्फत नेतृत्व चयन गर्न लागिएको छ । रास्वपाले वडा, पालिका हुँदै पहिलो जिल्ला अधिवेशन गरिरहेको हो । 

सुर्खेतमा प्रथम जिल्ला अधिवेशनबाट रमेशकुमार सापकोटा सर्वसम्मत सभापति चयन भएका छन् । सुर्खेत क्षेत्र नम्बर–२ बाट प्रतिनिधिसभा सदस्य निर्वाचित सापकोटा यसअघि पनि जिल्ला सभापति थिए । अन्य पदाधिकारीमा भने धेरै आकांक्षी भएपछि निर्वाचन गर्ने कि सर्वसम्मतिमा टुंग्याउने भन्नेबारे छलफल भइरहेको सभापति सापकोटाले बताए । 

त्यस्तै हुम्ला सभापतिमा लक्ष्मण ऐडी शनिबार नै निर्वाचित भएका थिए । ऐडी यसअघि उपसभापति थिए । जिल्ला उपसभापतिमा रिन्जेन लामा, सचिवमा मनोज बोहरा, सहसचिवमा तीर्थराज बुढा र कोषाध्यक्षमा कमन शाहीलाई पनि सर्वसम्मत चयन गरिएको ऐडीले बताए । 

सल्यानको सभापतिमा प्रकाश नेपाली निर्वाचित भएका छन् भने उपसभापति टीकाराम केसी, सचिवमा श्रीकान्त राई, सहसचिव हीरा योगी र कोषाध्यक्ष सीता मल्ल चयन भएको निर्वाचन समितिले जनाएको छ । 

त्यस्तै कालीकोटमा शनिबार भएको जिल्ला अधिवेशनले प्रेम केसीको सभापतित्वमा कार्यसमिति गठन गरेको छ । जसको उपसभापतिमा उपसभापति दिनेश शाही, सचिव भूपेन्द्र शाही, सहसचिव जीवनबहादुर शाहीसहित १३ सदस्यीय कार्यसमिति चयन गरिएको हो ।