सुर्खेत — कर्णाली छोरी सम्मेलनको दोस्रो संस्करण शनिबारदेखि वीरेन्द्रनगरमा आयोजना गरिएको छ । बालिका, किशोरी तथा महिलामाथि हुने लैगिंक विभेद, बालविवाह, छाउपडी, घरेलु हिंसा, यौन दुर्व्यवहार र मानव बेचबिखनलगायत सामाजिक कुरीतिविरुद्ध आवाज उठाउने उद्देश्यसहित सम्मेलन आयोजना गरिएको आयोजक ज्योति फाउन्डेसनले जनाएको छ ।

सम्मेलन शनिबार र आइतबार दुई दिनसम्म चल्नेछ । जसमा कर्णालीका ७९ स्थानीय तहबाट २/२ जना बालिकाको सहभागिता रहनेछ भने लोपोन्मुख राउटे, राजी, कुसुण्डा, बादी र बोटे समुदायका छोरीहरुले पनि उपस्थिति जनाउनेछन् । 

‘सम्मेलनमा लैंगिक तथा जातीय विभेद, महिला हिंसा, बालविवाह, घरेलु हिंसा, मर्यादित महिनावारी र छाउपडीलगायत विषयमा छलफल हुनेछ,’ संस्थाकी अध्यक्ष ज्योति कटुवालले भनिन्, ‘सम्मेलनमा उठाइएका विषयवस्तु तीनवटै तहका सरकारसमक्ष सुझावका रूपमा प्रस्तुत हुनेछन् ।’