सल्यान — यहाँको कुमाख गाउँपालिकामा किसानले पालेका पशु चौपायामा खोरेत रोगको संक्रमण बढ्दै गएको पाइएको छ । रोगको संक्रमण बढेपछि किसानले पालेका पशुचौपाया धमाधम बिरामी पर्न थालेका छन् । 

कुमाखका किसानले बाख्रा, भैंसी र गाई पालन गरेर आय आर्जन गर्दै आएका छन् भने त्यसैबाट घरखर्च चलाएका थिए । खोरेत रोग हावाबाट एक पशुबाट अर्को पशुमा सर्ने भएकाले महामारीको रूप लिने खतरा बढेपछि पालिकाभित्रका किसान चिन्तित बनेका हुन् । 

कुमाख गाउँपालिका–४ स्यानीपिप्लीका किसान कालीबहादुर बुढाले खोरेत रोगका कारण आफ्ना दुई गोरु, एक भैंसी र १० बाख्रा बिरामी परेको बताए । रोग अन्यमा सर्न थालेको उनले जानकारी गराए । ‘रोगबाट ग्रस्त भएका पशुचौपायाले घाँसपात खान छाडेका छन् । जसका कारण दुब्लाउँदै गएका छन्,’ उनले भने, ‘पालिकाको पशु शाखामा जानकारी गराएपछि पशु अस्पताल तथा पशु शाखा कार्यालय सल्यान र पालिकाको प्राविधिक टोली आएर भ्याक्सिन लगाएर फर्केको छ तर रोग पूर्ण रूपमा नियन्त्रणमा आउन सकेको छैन ।’ आफ्ना मात्र नभई बस्तीका २० भन्दा बढी परिवारले पालेका पशुचौपायामा अहिले खोरेत रोग देखिएको उनको भनाइ छ । 

कुमाख गाउँपालिका–१ का किसान नरबहादुर बुढाथोकीले खोरेत रोगका कारण धेरै किसानका बाख्रा, भैंसी, गाई र गोरु बिरामी परेको बताए । ‘भैंसी र बाख्रा पालेर धेरै परिवारले मासिक १५ देखि २५ हजार रुपैयाँसम्म कमाउँदै आएका थिए,’ उनले भने, ‘यसबाटै अधिकांशको घरखर्च चलेको थियो । रोगले पशु बिरामी परेपछि किसानलाई रोजीरोटी गुम्ने हो कि भन्ने चिन्ता बढ्न थालेको  छ ।’ 

कुमाख गाउँपालिका पशु शाखाका प्रमुख डा.विष्णु केसीले गत सातादेखि कुमाख गाउँपालिकाका वडा नं १, ४ र ६ मा किसानले पालेका ३ सय बढी पशु चौपायामा खोरेत रोगको संक्रमण देखिएको बताए । यो सरुवा रोग भएकाले सबैतिर फैलिने खतरा बढेको पनि उनले जानकारी दिए । पशु अस्पताल तथा पशु शाखा सल्यानको प्राविधिक सहयोगमा किसानका घर–घरमा गएर बिरामी पशु चौपायाको उपचार गर्नुका साथै भ्याक्सिन लगाएको र नमुना संकलन गरेर परीक्षणका लागि काठमाडौं पठाएको उनले बताए ।