सल्यान — दुई घण्टा लामो मुसलधारे वर्षासँगै शारदा नदी र खहरेखोलामा आएको बाढीले शनिबार दिउँसो सल्यानको बाग्चौर नगरपालिका–६, ७, ८, ९, १० र छत्रेश्वरी गाउँपालिका–१ र २ का दर्जनौं योजनामा क्षति पुर्‍याएको छ ।

खोलामा आएको बाढीले दुई दर्जन भन्दा बढी सडक, दर्जन बढी खानेपानी, सिँचाइ कुलो, तटबन्धनमा क्षति पुर्‍याएको हो । शारदा नदीले एक सय रोपनी भन्दा बढी खेतमा पोकेको गहुँ, तरकारी र सुन्तलामा क्षति पुर्‍याएको हो । बाढीले जलाउँदै गरेको शव, गहुँ बोकेको ट्याक्टर र पानीघट्ट पनि बगाएको थियो । वर्षाकै कारण पहिरो जाँदा दुई घरमा पनि क्षति पुगेको छ ।

बाढीपहिरोले सडक चिराचिरा पर्दा, कल्भर्ट, ह्युमपाइप बगाउँदा बाग्चौर नगरपालिकाका पाँच वडाका बिभिन्न सडकमा आइतबार पनि यातायात अवरुद्ध छ । बाढीले खानेपानीको मुहान पुर्नुका साथै पाईप बगाउँदा र ट्यांकीमा क्षति पुग्दा स्थानीय प्रभावित भएका छन् । 

बाग्चौर नगरपालिका–९ का अध्यक्ष यत्रबहादुर डाँगीले आएको बाढीले वडाभित्रका तीन दर्जन नयाँ पुराना सडक क्षतविक्षत बनाएको, चार खानेपानी योजनाको मुहान पुरेको, ट्यांकीमा क्षति पुर्‍याएको, पाइप बगाएको, स्थानीयको घट्ट बगाएको र दुई स्थानीयको घरमा क्षति पुर्‍याएको बताए । लगातार दुई घन्टा बढीको बर्षातले किसानले लगाएको अदुवा, आलु र सुन्तलामा समेत क्षति पुगेको उनले जानकारी दिए । उनका अनुसार वर्षातसँगै शारदा नदी र खहरेखोलामा आएको बाढीले पुर्‍याएको क्षतिको विवरण संकलन भइरहेको छ । सडक बिग्रदा गाडी चल्न सकेका छैनन् भने विभिन्न बस्तीका ३ सय बढी परिवार खानेपानीको लागि मुहान धाउन बाध्य भएका छन् । 

वडा ६ का अध्यक्ष ज्ञानबहादुर वलीले गत वर्ष मात्र सम्पन्न भएको ५० लाखको हिमचौर खानेपानी योजनामा बाढीले क्षति पुर्‍याएपछि १ सय २० परिवार पूर्णरुपमा प्रभावित भएको बताए । योजनामा क्षति पुगेपछि बिहानैदेखि धेरै समय हिँडेर नजिकका मुहानमा धाउनु परेको उनले बताए ।