वीरेन्द्रनगर —  

प्रदेश अस्पताल सुर्खेतमा हेलिप्याड निर्माण गरिएको छ । अस्पतालको छतमा हेलिप्याड निर्माण गरिएको हो। हेलिप्याड निर्माणसँगै दुर्गमबाट आएका बिरामीको उपचार सहज हुने अस्पताल प्रशासनले जनाएको छ ।

नेपाली सेनाको उत्तर–पश्चिम पृतना हेडक्वार्टर सुर्खेतको समन्वयमा  यहाँ प्राविधिक जाँच तथा परीक्षण उडान पनि गरिसकिएको छ । कालिकोटमा रुखबाट लडेर घाइते भएका बिरामीलाई हवाई उद्वार गरी सोमबार प्रदेश अस्पताल सुर्खेतमा ल्याउँदा यही हेलिप्याडको प्रयोग गरिएको छ। 

आकस्मिक स्वास्थ्य सेवालाई अझ छिटो, सहज र प्रभावकारी बनाउने उद्देश्यले हेलिप्याड निर्माण गरिएको अस्पतालकी सूचना अधिकारी (उपसचिव) अनिता ज्ञवालीले जानकारी दिइन् । हेलिप्याडले अब गम्भीर तथा आकस्मिक अवस्थाका बिरामीको शीघ्र उद्धार तथा समयमै उपचारमा महत्त्वपूर्ण भूमिका खेल्ने उनले बताइन् ।