वीरेन्द्रनगर — कर्णाली यूवा महोत्सवको दोस्रो संस्करण शनिबारदेखि सुरू हुने भएको छ । कर्णाली प्रदेशका युवाहरूको प्रतिभा पहिचान र क्षमता विकास गर्ने उद्देश्यका साथ कर्णाली युवा महोत्सवको दोस्रो संस्करण आयोजना गर्न लागिएको आयोजकले जनाएको छ ।

शनिबारदेखि (१९ र २० वैशाख) वीरेन्द्रनगरस्थित सिटी हलको प्रांगणमा महोत्सव सञ्चालन हुनेछ । कर्णालीका युवाहरूका लागि आफ्नो शक्ति, सिर्जनशीलता र सम्भावनालाई उजागर गर्ने साझा डबलीको रूपमा दोस्रो संस्करण गर्न लागिएको मूल आयोजक समितिका संयोजक विनोदकुमार शाहीले भने जानकारी दिए ।

कर्णालीको समृद्धिमा राज्यको दायित्व, जनप्रतिनिधि र युवाका सवाल, मिडियामा कर्णालीको स्थान, पर्यटन, शिक्षा, र स्वास्थ्य जस्ता विषयमा छलफल हुने उनले बताए । यस्तै महोत्सवमा वक्तृत्वकला, क्षितिज समर्पणद्वारा लिखित पुस्तक तोरकिन र ओम रिजालद्वारा लिखित पैकेलोको पनि चर्चा गरिनेछ ।