सुर्खेत — सोमबारदेखि सञ्चालन हुने माध्यमिक शिक्षा उत्तीर्ण कक्षा १२ को परीक्षामा कर्णालीबाट २४ हजार बढी परीक्षार्थी सहभागी हुँदै छन् । राष्ट्रिय परीक्षा बोर्डले सञ्चालन गर्ने उक्त परीक्षाको सम्पूर्ण तयारी पूरा भएको बोर्डको सुर्खेतस्थित प्रदेश परीक्षा व्यवस्थापन कार्यालयले जनाएको छ । 

कार्यालयका अनुसार यस वर्ष कर्णालीका ८ जिल्लाबाट २४ हजार ४ सय १७ जना विद्यार्थी सहभागी हुने छन् । आठ जिल्लाका २ सय ९६ वटा विद्यालयका लागि ९० वटा परीक्षा केन्द्र कायम गरिएको कार्यालयको भनाइ छ । 

रुकुम पश्चिम र सल्यानलाई बोर्डको दाङ कार्यालयले हेर्ने हुँदा सुर्खेत, दैलेख, जाजरकोट, कालिकोट, डोल्पा, मुगु, जुम्ला र हुम्ला जिल्लाका परीक्षा केन्द्रको व्यवस्थापन सुर्खेतस्थित प्रदेश परीक्षा व्यवस्थापन कार्यालयले नियमन तथा निर्देशन गर्नेछ ।

कर्णालीबाट यस वर्ष नियमिततर्फ १७ हजार १ सय २५ र आंशिकतर्फ ७ हजार २ सय ९२ जना परीक्षार्थी सहभागी हुने प्रदेश परीक्षा व्यवस्थापन कार्यालयका प्रमुख महेश देवकोटाले जानकारी दिए । उनले यस वर्ष सबैभन्दा धेरै सुर्खेतबाट ८ हजार १ सय ११ जना र सबैभन्दा कम डोल्पाबाट ६ सय ६ जना परीक्षार्थी सहभागी हुने बताए । उनका अनुसार गत वर्षको तुलनामा यस वर्ष करिब ७ हजार विद्यार्थी घटेका छन् ।

गत वर्षसम्म पुरानो कोर्ससहितका ३१ हजार विद्यार्थी सहभागी थिए । यस वर्षदेखि पुरानो कोर्सबाट परीक्षा दिने अवसर सकिएकाले विद्यार्थीको संख्या घटेको उनको भनाइ छ । उनले परीक्षा सम्पन्न गर्न ९० जना केन्द्राध्यक्ष, १ सय ८० जना सहायक केन्द्राध्यक्ष, ६ सय १२ जना निरीक्षक, ९० जना कर्मचारी, १ सय ८० जना सहयोगी कर्मचारी र ९ सय सुरक्षाकर्मी परिचालन हुने बताए ।