सल्यान — जिल्ला अस्पतालका दुई भवन र छत्रेस्वरी गाउँपालिका–५ लेखपोखरामा निर्माणाधीन १५ शय्याको पालिका अस्पताल भवनको काम रोकिएको दुई वर्षपछि निर्माण सुरु भएको छ । 

ठेकेदारले विभिन्न बहाना बनाई कामै नगर्दा जिल्ला अस्पतालका दुई भवन र छत्रेस्वरी गाउँपालिका–५ लेखपोखरामा निर्माणाधीन १५ शय्याको अस्पताल भवन अलपत्र परेको थियो । सम्बन्धित निकायले ठेक्का रद्द गर्ने भन्दै पत्र पठाएपछि निर्माण कम्पनीले अलपत्र परेको अस्पताल भवन निर्माणको काम सुरु गरेका हुन् । 

जिल्ला अस्पताल सल्यानलाई ५० शय्यामा विस्तार गर्न भौतिक संरचना अपुग भएपछि संघीय सरकारले २०७७ मा १८ करोड बजेट विनियोजन गरेपछि २०७८ देखि जिल्ला अस्पतालका दुई भवन निर्माणको काम सुरु गरिएको थियो । भवन निर्माणको जिम्मेवारी आरोग्य सुवेदी जेभी कम्पनीले पाएको थियो । म्याद थप हुन नसक्दा निर्माण कम्पनीले ७५ प्रतिशत काम गरेर त्यत्तिकै छाडेको थियो । 

यस्तै छत्रेस्वरी गाउँपालिकाको १५ शय्याको अस्पताल भवन निर्माणका लागि संघीय सरकारले २०७७/०७८ मा १८ करोड विनियोजन गरेको थियो । उक्त कामको १३ करोड लागतमा मेनका ग्याल्वा जेभीले जिम्मा पाएको थियो । यहाँ निर्माण कम्पनीले सुरुवातमा लगातार पाँच महिना काम गरेको थियो । पछि कोरोना महामारीको कारण देखाउँदै विभिन्न बहाना बनाई १५ प्रतिशत मात्र काम गरेर छाडेको थियो । 

ठेकेदारकै लापरवाहीले झन्डै दुई वर्षदेखि रोकिएको जिल्ला अस्पतालका दुई भवन गत चैतमा म्याद थप भएपछि अहिले निर्माण कम्पनीले काम गरिरहेको स्वास्थ्य सेवा कार्यालय सल्यानका प्रमुख डा. अर्जुन बुढा मगरले बताए । झन्डै ७५ प्रतिशत काम भैसकेको योजना यो आर्थिक वर्षभित्रै सम्पन्न गर्ने लक्ष्य रहेको उनले जानकारी दिए । 

भवन निर्माणको काम लामो समय अलपत्र पर्दा सिमेन्टलगायतका सामग्री त्यत्तिकै खेर गएको र जिल्ला अस्पताललाई ५० शय्यामा विस्तार कार्य ओझेलमा परेको उनले बताए । 

प्रदेश तथा संघीय सरकारबाट दबाब आएको र साताभित्रै काम सुरु नगरे ठेक्का रद्द गर्ने भन्दै पत्र लेखेपछि ठेकेदारले अलपत्र परेको भवनको काम सुरु गरेको र अहिले काम गर्न थालेको डेढ महिना भएको छत्रेस्वरी गाउँपालिकाका ईन्जिनियर राजाराम रिजालले बताए ।