सल्यान — सडक यातायात सहज भएपछि जिल्लाको प्रमुख पर्यटकीयस्थल तथा 'मिनी रारा'को नामले परिचित कुपिण्डे तालमा आन्तरिक पर्यटक बढेका छन् । तालसम्म पुग्ने सडक कालोपत्र भएसँगै आउजाउ सहज भएपछि यहाँ पर्यटकको संख्या बढेको हो । नयाँ वर्षको अवसरमा ताल अवलोकन तथा डुंगा सहर गर्न आउनेको संख्या झनै बढेको छ ।  

कुपिण्डे नगरपालिका–८ मा पर्ने ताल अवलोकन गर्न नयाँ वर्षको पहिलो दिन मंगलबार २ हजार जना आएका थिए । त्यसअघि र पछिका दुई दिनमा दैनिक १५० देखि २ सय पर्यटक आइरहेका छन् । आन्तरिक पर्यटक ताल अवलोकनका साथै डुंगा सयर गरेर रमाउने गरेका छन् । 

कुपिण्डे तालमा बिहानदेखि बेलुकीसम्म चहलपहल बढ्न थालेपछि  स्थानीयको ब्यापार समेत बढाएको छ । ताल परिसर अहिले खुद्रा पसलले भरिन् थालेका छन् भने स्थानीयस्तरमा उत्पादित फलफुल बिक्री गर्नेको संख्या पनि बढेको छ ।  

ताल अवलोकन गर्न आउनेलाई बस्न, खान भने पर्याप्त सुविधा छैन । घुम्न आएकालाई केही समय आराम गर्नकै लागि पनि उपयुक्त बिश्रामघर तथा प्रतिक्षालयको सुविधा नभएको स्थानीयले बताए । सडक कालोपत्र भएपछि सहजै गाडीमा आउजाउ गर्न सकिने भएपछि पर्यटकको संख्या बढेको हो । यहाँ प्राकृतिक सुन्दरताको अवलोकन, तालमा डुंगामा सयर गर्न र मन्दिर छेउमा रहेको बराह मन्दिर दर्शन गर्न आउने गरेका हुन् । यहाँ रहेको वराह मन्दिरमा पूजा गरे सन्तान प्राप्ति हुने धार्मिक विश्वास रहेको वडाध्यक्ष कुलबहादुर पुरीले बताए ।

कुपिण्डे ताल छेवैमा होटल संचालन गरेर बसेका स्थानीय सुकदेव आचार्यले ताल तथा मन्दिर अवलोकन र पूजाआजा गर्न आउनेको संख्या बढेपछि ब्यवसाय फस्टाउन थालेको र स्थानीयलाई रोजगारी मिलेको बताए । पर्यटक बढेपछि अन्य खर्च कटाएर आफुले दैनिक ४ हजारसम्म कमाइरहेको उनले जानकारी दिए । ‘रमाउने मात्र नभई मोबाइलबाट भिडियो, फोटो खिचेर टिकटक, युट्युब पोष्ट गर्ने उद्देश्यले पनि आन्तरिक पर्यटक आउने गरेका छन् । जसमा युवा पुस्ता धेरै हुन्छन्,’ उनले भने, ‘ताल र मन्दिरको अध्ययनका लागि भने कमै आएको देखिन्छ ।’ स्थानीय तहले ताल अवलोकन गर्न आउने पर्यटक, गाडी र पिकनिक खान आउनेबाट शुल्क उठाउँदै आए पनि व्यवस्थापनमा भएको बेवास्ताले ताल वरपर फोहर बढ्दै गएको उनको भनाई छ ।