बुवाको स्वास्थ्य सुधार गर्न एम्बुलेन्समार्फत सुर्खेत जाँदै गर्दा भीमबहादुर अधिकारीको दुर्घटनामा निधन भएपछि गाउँलेहरू सामाजिक सेवामा सक्रिय युवा गुमाएको शोकमा छन्।
What you should know
जुम्ला — हिमा गाउँपालिका–७ का भीमबहादुर अधिकारी ७१ वर्षीय बुवा कलबहादुर अधिकारीको उपचार गर्न बुधवार एम्बुलेन्समा सुर्खेततिर जाँदै थिए । उनले जसरी पनि बुवाको उपचार गरी निको बनाएर घर फर्किने आफन्तहरूसँगको भेटमा भनेका थिए ।
६ दिनसम्म कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा भर्ना गरेर उपचार गर्दा पनि सुधार नभएपछि अस्पतालले सुर्खेतको नेपालगन्ज अस्पतालमा युरो सर्जरीका लागि भन्दै कलबहादुरलाई रेफर गरेको थियो ।
कलबहादुरका छोरा भीमबहादुरले जहाजको बाटो हेरे । जहाजमै जाने निधो गरेका उनी मौसम खराबका कारण जहाज नआएपछि एम्बुलेन्समा बुवालाई लिएर बुधबार बेलुका सुर्खेत हिँडेका थिए ।
बुधबार दिउँसो १ बजेतिर उनले सामाजिक सञ्जाल फेसबुकमा एउटा स्टाटस पोस्ट गरे, ‘आज जुम्लादेखि सुर्खेत यात्रा शुभ रहोस्, जुम्लामा हवाईजहाज नआएर एम्बुलेन्समै लागियो ।' उनले एम्बुलेन्स नजिकै आफन्तहरूसँगै भेला भएको तस्बिरसमेत सार्वजनिक गरे । अहिले त्यो तस्बिर सामाजिक सञ्जालमा भाइरल छ ।
बुवाको उपचार गरेर निको बनाइसकेपछि परिवारमा सुखद भेट गराउने धोको उनको थियो । तर दुर्भाग्य ! न उनले बुवाको उपचार गर्न पाए, न त पारिवारिक भेटको सुखद क्षणको अनुभूति नै गर्न पाए । उल्टै एम्बुलेन्स दुर्घटनामा परेर सदाका लागि बिरामी बुवालाई छाडेर उनी नै अस्पताए ।
बिरामी लिएर बुधबार दिउँसो २ बजे सदरमुकाम खलंगाबाट एम्बुलेन्स छुटेको प्रहरीले जनाएको छ । ‘कालिकोटमा बाक्लो हुस्सु लागेको थियो । गाडी चलाउन निकै असहज थियो,’ कालिकोट प्रहरी प्रमुख डीएसपी हिमबहादुर खत्रीले भने, ‘हुस्सुका कारण एम्बुलेन्स दुर्घटना भएको हुन सक्ने प्रारम्भिक अनुमान छ ।’
एम्बुलेन्समा परेर चालक शक्तिबहादुर शाही र भीमबहादुर अधिकारीको मृत्यु भयो । उपचार गराउन लगिएका बिरामी बुवा अहिले घाइते अवस्थामा कालिकोट जिल्ला अस्पतालमा थप उपचार गराइरहेका छन् ।
‘न बुवाको उपचार भयो, न त भीमबहादुरको बुवालाई निको बनाएर घर पुर्याउने सपना नै पुरा भयो,’ हिमा–६ का जीवन रावतले भने, ‘हिमा–६ ले एक व्यक्ति मात्र होइन, समाजको ऊर्जाशील शक्ति नै गुमायो । परिवर्तनको हुटहुटी बोकेको, विचारवान् र समाजप्रति अनवरत खटिने युवा शक्ति गुमायो ।’
२०७४ सालमा भीमबहादुर वडा सदस्यका रूपमा चुनिएका थिए । उनको मृत्युसँगै अहिले उनले गरेको योगदानको गाउँमा चर्चा भइरहेको छ ।
जुम्लादेखि बिरामी लिएर गएको ना०१००१झ ००२४ नम्बरको एम्बुलेन्स बुधबार बेलुकी पौने ८ बजे कालिकोटमा दुर्घटनामा परेको थियो । कालिकोट जिल्ला प्रहरीका अनुसार एम्बुलेन्स सडकदेखि २५ मिटर तल खसेर दुर्घटना भएको थियो ।
