कालिकोट — कालिकोटमा परेको बेमौसमी वर्षाका कारण क्षतिग्रस्त भएका दुई विद्यालयको पुनर्निर्माणका लागि जिल्ला विपद् व्यवस्थापन समितिले सिफारिस गरेको छ।

नरहरिनाथ गाउँपालिका–३ स्थित रमा माध्यमिक विद्यालयको निर्माणाधीन खेलमैदानसहितको भवन र रास्कोट नगरपालिका–१ रामपुरमा रहेको सुन्दर आधारभूत विद्यालय पहिरोले भत्किएपछि तिनको पुनर्निर्माण आवश्यक देखिएको हो।

आइतबार बसेको समितिको बैठकले प्रहरी मुचुल्कासहित दुवै विद्यालयको पुनर्निर्माणका लागि सम्बन्धित निकायमा सिफारिस गर्ने निर्णय गरेको प्रमुख जिल्ला अधिकारी तथा समितिका अध्यक्ष गोकर्णराज सुवालले जानकारी दिए। उनका अनुसार विद्यालय भवन र खेलमैदान क्षतिग्रस्त हुँदा पठनपाठनमा समस्या उत्पन्न भएकाले स्थानीय सरकार, सामाजिक विकास मन्त्रालय र शिक्षा मन्त्रालयसँग पुनर्निर्माणका लागि आग्रह गरिएको छ। थप क्षति हुन नदिन आवश्यक सतर्कता अपनाउनुपर्ने पनि उनले उल्लेख गरे।

बैठकले आगामी सुख्खा यामलाई ध्यानमा राख्दै डढेलो, आगलागी, हुरीबतास र चट्याङजस्ता विपद् जोखिम न्यूनीकरणका लागि सबै निकायलाई स्रोत–साधन परिचालन गरी तयारी अवस्थामा रहन निर्देशन दिएको छ। साथै, कर्णाली राजमार्ग तथा अन्य करिडोर क्षेत्रमा सम्भावित पहिरो हटाउन सडक विभागलाई हेभी उपकरण तयारी अवस्थामा राख्न आग्रह गरिएको छ।

स्थानीय तहहरूले विपद् उद्धारका लागि खरिद गरेका सामग्री नजिकको प्रहरी कार्यालयलाई हस्तान्तरण गर्ने निर्णय भने विवादित बनेको छ। नेपाल रेडक्रस सोसाइटीका जिल्ला सभापति बलप्रसाद सञ्ज्यालले उक्त निर्णयप्रति असन्तुष्टि जनाउँदै स्थानीय आपतकालीन केन्द्रहरूलाई सुदृढ बनाउनु आवश्यक रहेको बताए।