जुम्ला — जुम्लाको तातोपानी गाउँपालिका–१ राँकास्थित गणेश माध्यमिक विद्यालयका प्रधानाध्यापक नरेन्द्रबहादुर महतसहित तीन जनाविरुद्ध विशेष अदालतमा भ्रष्टाचार मुद्दा दर्ता भएको छ । उनीहरूविरुद्ध छात्रवृत्ति रकम पाँच वर्ष नबाँडेको र दिवा खाजाको रकम हिनामिना गरेको आरोप छ । 

अख्तियार दुरुपयोग अनुसन्धान आयोगको केन्द्रीय कार्यालयले सोमबार  विद्यालय व्यवस्थापन समितिका अध्यक्ष तीलप्रसाद भट्टराई र लेखा सहायकविरुद्ध विशेष अदालतमा आरोपपत्र दायर गरेको हो ।

आरोपपत्रमा आर्थिक वर्ष २०७९/८० मा विद्यालयलाई प्राप्त १ लाख ४५ हजार ३ सय ५० रुपैयाँ छात्रावृत्ति रकम हिनामिना गरेको उल्लेख छ । प्रधानाध्यापक महतले २०८० चैत २१ मा कक्षा १ देखि ५ सम्मका छात्रालाई छात्रवृत्ति रकम १ हजार रुपैयाँको दरले ८३ जनालाई र कक्षा ६ देखि ८ सम्मका छात्रालाई १ हजार ४ सय ८५ रुपैयाँ २३ पैसाका दरले ४४ जनालाई ६५ हजार ३ सय ५० रुपैयाँ गरी जम्मा १ लाख ४८ हजार ३ सय ५० रुपैयाँ वितरण गरेको भर्पाई तातोपानी गाउँपालिकालाई पठाएको देखिएको छ ।