सुर्खेत — गत फागुन २३ गते मृत्यु भएकी १६ वर्षीया इनिशा विकको अनुसन्धान अझै टुंगिएको छैन । घटनाबारे केन्द्रीय अनुसन्धान ब्युरो (सीआईबी) सहित नेपाल प्रहरीको चार टोलीले छुट्टाछुट्टै अनुसन्धान गरिरहेको छ । तर फरेन्सिक रिपोर्ट नआउँदा अनुसन्धान नटुंगिएको हो । जसका कारण इनिशाको शव १६ दिनदेखि कर्णाली प्रदेश अस्पतालमै छ । 

गुर्भाकोट नगरपालिका–६ बडाखोली स्थायी घर भई वीरेन्द्रनगर–१ मा बस्दै आएकी १६ वर्षीया इनिशा गत फागुन २३ गते वीरेन्द्रनगर–४ स्थित जनजागरण सामुदायिक वनमा बेहोस अवस्थामा फेला परेकी थिइन् । प्रहरी र स्थानीयले उद्धार गरी प्रदेश अस्पताल ल्याए पनि उनको मृत्यु भइसकेको चिकित्सकले घोषणा गरेका थिए । उषा बालवाटिका माध्यमिक विद्यालयमा कक्षा ११ मा विज्ञान विषय पढ्दै आएकी उनी त्यस दिन ट्युसन पढ्न जान्छु भन्दै घरबाट निस्किएकी थिइन् । 

घटनामा संलग्न भएको आरोपमा जिल्ला प्रहरी कार्यालयले चार नाबालकलाई पक्राउ गरेको छ । उनीहरुमध्ये ३ जना उषा बालवाटिका माध्यमिक विद्यालयमै अध्ययनरत हुन् ।

घटनाको पर्सिपल्ट मृतकका परिवारले सामूहिक बलात्कारपछि हत्या भएको भन्दै कर्तव्य ज्यान र जबर्जस्ती करणी मुद्दामा किटानी जाहेरी दिएका थिए । प्रहरीले विभिन्न कोणबाट उनीहरुको बयान लिने काम भइरहेको जनाएको छ । ‘मृतक र आरोपीहरुको भेजाइनल स्वाब र मुखतिरको स्वाब फरेन्सिक जाँचका लागि केन्द्रीय विधिविज्ञान प्रयोगशालामा पठाइएको छ, मेसिनमा केमिकलसहित केही दिन राखेर स्वाबको परीक्षण गर्नुपर्ने हुन्छ,’ कार्यालयका डीएसपी मोहनजंग बुढथापाले भने, ‘अब १/२ दिनभित्रै त्यो रिपोर्ट आएपछि अनुसन्धान निष्कर्षमा पुग्छ ।’

मृतकका बाबु इन्द्रबहादुर विकले घटनालाई विभिन्न तरिकाले तोडमोड गर्न खोजिएको र अनुसन्धानमा ढिलाइ भइरहेको आरोप लगाए । ‘सामूहिक रुपमा बलात्कारपछि हत्या भएको छ, घटनामा संलग्नमाथि कडा कारबाहीको ग्यारेन्टी नहुँदासम्म हामी शव बुझ्दैनौं,’ उनले भने, ‘मेरो छोरीको हत्या योजनाबद्ध रूपमा भएको छ, हामीलाई न्याय चाहियो ।’