गत फागुन २५ गते घरबाट सानीभेरी नदीपारि छिमेकमा साथीको बिहेमा सहभागी हनु गएकी १३ वर्षीया सपना ओली सोही रातिदेखि बेपत्ता भएकी थिइन्
रुकुम पश्चिम — १४ दिनअघि बेपत्ता भएकी रुकुम पश्चिमकी एक किशोरीको शव आज सानीभेरी नदीमा भेटिएको छ । मुसिकोट नगरपालिका-१३ छिबाङ नजिकै भेटिएको उक्त शव बाँफिकोट गाउँपालिका-३ गरालाबोटकी १३ वर्षीया सपना ओलीको भएको प्रहरीले बताएको छ ।
गत फागुन २५ गते घरबाट सानीभेरी नदीपारि छिमेकमा साथीको बिहेमा सहभागी हनु गएकी ओली सोही रातिदेखि बेपत्ता भएकी थिइन् । उनीसँगै गएका उनका सहोदर काकाका दुई छोरीहरू १२ वर्षीया उर्मिला र १४ वर्षीया कल्पनाको भने भोलिपल्ट बिहान गाउँनजिकै नदी किनारमा शव भेटिएको थियो ।
सपना बेपत्ता भएपछि उनको घरपरिवार र प्रहरीले खोजीकार्य जारी राखेको थियो । आज दिउँसो छिबाङका स्थानीयले नदीमा शव देखेपछि प्रहरीलाई खबर गरेको र सपनाका आफन्तलाई बोलाएर पहिचान गरिएको जिल्ला प्रहरी प्रमुख डीएसपी वेदबहादुर पौडेलले जानकारी दिए ।
‘यो घटनाको कारणबारे धेरै एंगलबाट हामीले अनुसन्धान गरिरहेका छौं । र पोस्टमार्टम रिपोर्टसमेत हेर्दा अहिलेसम्म उनीहरू नदी तर्न खोज्दा बगेरै ज्यान गएको पाइएको छ । यसमा थप केही भएमा त्यसको पनि अनुसन्धान गरिने नै छ,’ उनले भने ।
नदी किनारमा भेटिएको शव आजै पोस्टमार्टम गरेर आफन्तलाई जिम्मा लगाउने पनि प्रहरीले जानकारी दिएको छ ।
