कालिकोट — साथीको बुवाबाट बलात्कारमा परेकी १३ वर्षीया बालिका जिल्ला अस्पतालको एकद्वार संकट व्यवस्थापन केन्द्रबाट मान्म बजारस्थित सुरक्षित आवासमा ल्याइएको छ ।

अस्पतालमा आवश्यक सेवा दिएपछि उनलाई सोसेक नेपालले सञ्चालन गरेको सुरक्षित आवासमा पठाइएको अस्पताल प्रमुख डा. रत्नवीर सुनारले बताए । अस्पतालले दिने आवश्यक सेवा दिएर सुरक्षित आवासमा गइसकिन् । उनले भने, ‘ओसिएमसीको रेखदेखमा आवश्यक परामर्श गर्ने गरी पठाइएको हो ।’

प्रहरी हिरासतमा रहेका पीडक पुरुषको अनुसन्धान सकिए पनि जिल्लामा सरकारी वकिल र न्यायाधीश नभएकाले हिरासतमै रहेको अनुसन्धान अधिकृत गणेश ज्ञवालीले बताए ।

‘पीडकलाई पक्राउ गरेपछि सरकारी वकिलमार्फत जिल्ला न्यायधीशले १२ दिनको म्याद दिएका थिए । १२ दिन त पुगेको छैन । उनले भने सरकारी वकिल र श्रीमान (जिल्ला न्यायधीश) आएपछि अदालतमा पेश गरेर कारागार चलान हुन्छ,’ उनले भने । पीडकले जबरजस्ती करणी गरेको स्वीकार गरिसकेकोले आवश्यक प्रक्रिया पूरा गरेर अदालत पेश गरिने जानकारी दिए ।