सुर्खेत — दुई जना छोराछोरीसहित सम्पर्कविहीन भएकी सुर्खेतकी माया कठायतकी छोरीको पनि शव भेटिएको छ।

आइतबारदेखि सन्तानसहित सम्पर्कविहीन भएकी मायाको शव सोमबार बेलुका भेरी नदीमा फेला परेको थियो। उनकी ११ वर्षीया छोरी आशाको शव भने मंगलबार बिहान भेटिएको जिल्ला प्रहरी कार्यालय सुर्खेतले जनाएको छ।

प्रहरीका अनुसार सोमबार बेलुका सुर्खेतको लेकबेँसी नगरपालिका–३ को पटारे भन्ने ठाउँमा भेरी नदीमा मायाको शव फेला परेको थियो । छोरी आशाको शव भने मंगलबार बिहान गुर्भाकोट नगरपालिका–१२ स्थित भेरी नदी किनारमै भेटिएको हो ।

मायाका ५ वर्षीय छोरा दीपकको अवस्था भने अझै अज्ञात रहेको छ। उनको खोजी कार्य जारी रहेको प्रहरीले जनाएको छ।

माया आफ्ना सन्तानसहित सम्पर्कविहीन भएपछि उनीहरू भेरी नदीमा बेपत्ता भएको हुन सक्ने आशंकासहित प्रहरी तथा स्थानीयले खोजी सुरु गरेका थिए।