सुर्खेत — वीरेन्द्रनगरमा शनिबार बिहान ट्युसन पढ्न घरबाट निस्किएकी किशोरीको शंकास्पद मृत्युपछि चार जना पक्राउ परेका छन् । किशोरीको परिवारले कर्तव्य ज्यान र जबर्जस्ती करणीसम्बन्धी उजुरी दिएपछि शनिबार एक जना र मंगलबार तीन जना पक्राउ परेका हुन् ।

वीरेन्द्रनगर–१ की १६ वर्षीया इनिसा विक गत शनिबार वीरेन्द्रनगर नगरपालिका–४ सहिदपार्क नजिकैको जनजागरण सामुदायिक वनमा बेहोस अवस्थामा फेला परेकी थिइन् । उनलाई उपचारका लागि प्रदेश अस्पताल लाने क्रममा मृत्यु भएको थियो । उनको शव अहिले अस्पतालमै राखिएको छ ।

मृतकको परिवारले सामूहिक बलात्कार भएको दाबी गरेको छ । जिल्ला प्रहरी कार्यालयका प्रवक्ता डीएसपी मोहनजंग बुड्थापाले अनुसन्धानका लागि चार जनालाई पक्राउ गरिएको जानकारी दिए । ‘सबै कोणबाट घटनाको अनुसन्धान गरिरहेका छौं । प्रदेश अस्पतालमा गरिएको पोस्टमार्टमको रिपोर्ट आइसकेको छैन,’ उनले भने, ‘पक्राउ परेकाहरू नाबालिग हुन् । उनीहरूको बयान सुरु भएको छैन ।’

प्रहरीका अनुसार पुनः पोस्टमार्टम र थप अनुसन्धानका लागि भेरी अस्पताल नेपालगन्जबाट तीन जना विशेषज्ञको टोलीलाई सुर्खेत बोलाइएको छ । इनिसाका बाबु नेपाली सेनाबाट अवकाश पाएपछि रोजगारीका लागि दुबईमा छन् । झन्डै ६ वर्षअघि मृतकका दाइको पनि मृत्यु भएको थियो । इनिसा आमा र भाइसँगै बस्दै आएकी थिइन् । गुर्भाकोट स्थायी घर भएका उनीहरूको घर वीरेन्द्रनगरमा पनि छ ।

परिवारजनका अनुसार शनिबार बिहान करिब ६ बजे ट्युसन पठ्न जान्छु भन्दै इनिसा घरबाट निस्किएकी थिइन् । घटनाबारे जानकारी पाएर सामुदायिक वनमा पुग्दा उनी रगताम्मे अवस्थामा फेला परेकी थिइन् । पोस्टमार्टम रिपोर्ट आएपछि घटनाको वास्तविकता खुल्ने जिल्ला प्रहरी प्रमुख एसपी सुधीरराज शाहीले बताए ।