भौगोलिक रुपमा विकट उपल्लो डोल्पामा मतपेटिका सुरक्षित रूपमा ढुवानी गर्न हेलिकप्टर प्रयोग गरिने भएको हो ।
डोल्पा — हिमाली जिल्ला डोल्पाको उत्तरी क्षेत्रमा पर्ने माथिल्लो डोल्पाका २३ मतदान केन्द्रबाट मतपेटिका संकलन गर्न हेलिकप्टर प्रयोग गरिने भएको छ ।
भौगोलिक रुपमा विकट उपल्लो डोल्पामा मतपेटिका सुरक्षित रूपमा ढुवानी गर्न हेलिकप्टर प्रयोग गरिने भएको हो । प्रमुख जिल्ला अधिकारी जुनु हमालले हेलिकप्टर आइपुगेको भन्दै शुक्रबार बिहानैदेखि उपल्लो डोल्पाका सबै मतदान केन्द्रका मतपेटिका ढुवानी सुरु गरिने जानकारी दिइन् ।
स्थायी र अस्थायी गरेर कुल ७० वटा मतदान केन्द्र भएको डोल्पामा स्वच्छ, मर्यादित एवम् शान्तिपूर्ण रुपमा मतदान सम्पन्न भएको मुख्य निर्वाचन अधिकृतको कार्यालयले जनाएको छ । उनका अनुसार डोल्पामा कुल ६६.१६ प्रतिशत मत खसेको छ भने
संख्यात्मक हिसाबमा भन्नुपर्दा १५ हजार ९ सय ५६ मत खसेको कार्यालयको भनाइ छ । कुल मतदाता २४ हजार १ सय १५ रहेको डोल्पामा ८ हजार १ सय ५९ मत भने खसेन ।
