जुम्ला — बिहीबार सम्पन्न प्रतिनिधिसभा सदस्य निर्वाचनमा जुम्लामा ५३ दशमलव ९९ प्रतिशत मत खसेको छ । कुल ७१ हजार ७ सय ३९ मतदाता रहेको जुम्लामा ३९ हजार १ सय १२ अर्थात ५३.९९ प्रतिशत मत खसेको हो । सहायक निर्वाचन अधिकृत हरिकृष्ण तिमिल्सेनाका अनुसार बिहान ७ बजेदेखि बेलुकी ५ बजेसम्म मतदान भएको थियो । 

जिल्लाको ११० मतदान केन्द्रमा मतदान एकैसाथ सुरु भएको थियो । महिला २० हजार ४५ र पुरुष १९ हजार ६७ जनाले मतदान गरेको मुख्य निर्वाचन अधिकृतको कार्यालय जुम्लाले जनाएको छ । 

३२ हजार ६ सय २७ मतदाता सहभागी भएनन ।  जिल्लाका सबै मतदान केन्द्रमा शान्तिपुर्ण मतदान कार्य सकिएको छ । मतदान सकिएपनि मतपेटी ल्याउने काम चलिरहेको छ । मतपेटिका मुख्य निर्वाचन कार्यालयमा ल्याइसकेपछि सर्वदलीय बैठकको निर्णय अनुसार मतगणना सुरु गर्ने तयारी भइरहेको छ ।