डोल्पा — उपल्लो डोल्पाका २३ मध्ये १२ मतदान केन्द्रमा अझै कर्मचारी र निर्वाचन सामग्री पुर्‍याउन सकिएको छैन ।शनिबार एउटा र आइतबार दुईवटा हेलिकप्टर प्रयोग गरेर पनि निर्वाचन सामग्री पुर्‍याउन नसकिएको हो ।

प्रमुख जिल्ला अधिकारी जुनु हमालका अनुसार उपल्लो डोल्पाका लागि शनिबार एउटा र आइतबार १० वटा गरेर जम्मा ११ वटा उडान गरिएको छ ।

‘डोल्पोबुद्ध गाउँपालिकाकाका ६ वटै मतदान केन्द्रमा आवश्यक सामग्रीसहित कर्मचारी पठाइसकिएको छ । शे–फोक्सुण्डो गाउँपालिकाको फु गाउँ, फोत गाउँ, भिजेर, निजाल आज पठाइयो । शे–फोक्सुण्डो गाउँपालिकामा केही मतदान  केन्द्र र  छार्काताङ्सोङ् गाउँपालिकाका ६ वटै मतदान केन्द्रमा पठाउन सकिएन,’ हमालले भनिन्, ‘दुईवटा पालिकाका १२ वटा मतदान केन्द्रमा अझै निर्वाचन सामग्री र कर्मचारी पठाउन बाँकी रहेको हो । सकभर बाँकीमा सोमबार र नभए मंगलबारभित्र सक्ने योजना छ ।’

एकाबिहानैदेखि उडान गरे पनि डोल्पामा दुई बजेपछि तीव्र बेगमा हावा लाग्न सुरु हुने भएकाले आइतबार सबै उडान गर्न नसकिएको उनको भनाइ छ । 

हेलिकप्टरले पुर्‍याउन सम्भव नभएमा शे–फोक्सुण्डो गाउँपालिकामा पर्ने तल्लो भेगका मतदान केन्द्रमा हिँडाएर पठाउने योजना रहेको प्रजिअ हमालले बताइन् ।

उपल्लो डोल्पामा निर्वाचन सामग्री र कर्मचारी लैजानका लागि डोल्पामा रहेका दुईवटा हेलिकप्टरमध्ये एउटा हेलिकप्टर फर्किसकेको बताइएको छ ।