बस्तीबाट मतदान केन्द्र टाढा पर्ने भएकाले छेप्काबासीलाई मतदान गरेर फर्किन दिनभर लाग्ने गरेको हो।
डोल्पा — हिमाली जिल्ला डोल्पाको शे–फोक्सुण्डो गाउँपालिका-८ मा पर्ने छेप्काका बासिन्दालाई मतदान गर्न दिनभर लाग्ने गरेको छ ।
बस्तीबाट मतदान केन्द्र टाढा पर्ने भएकाले छेप्काबासीलाई मतदान गरेर फर्किनै दिनभर लाग्ने गरेको हो ।
यहाँका मतदातालाई तापरिजा माध्यामिक विद्यालय साइजलमा रहेको केन्द्र तोकिएको छ । विगतदेखि नै आफ्नो मताधिकार प्रयोग गर्न दिनभर पैदल हिँडेर मतदान केन्द्रमा पुग्नुपर्ने बाध्यता रहेकाे छेप्काका स्थानीय मतदाता नोर्वु लामाले बताए।
यो गाउँमा ३० जना हाराहारीमा मतदाता छन् । 'हरेक निर्वाचनमा मतदान गर्न बिहानै हिँडेपछि रातिमात्र घर पुग्न सकिन्छ। बृदबृद्धाले त या अघिल्लो दिनै गएर उतै बस्नु पर्छ नभए मतदान सकेर घर पुग्न सकिँदैन,' लामाले भने । केही बृद्धबृद्धा दिनभर हिँड्न नसक्ने भएकाले मतदान गर्न नजाने गरेको उनले बताए ।
छेप्का रेँचीलगायतका गाउँका मतदातालाई समेटेर नजिकमा अर्काे केन्द्र कायम गरिए आफहरुलाई सहज हुने उनको भनाइ छ । यो वडाको अर्को मतदान केन्द्र रिग्मो गाउँमा तोकिएको छ । दुई वटै मतदान केन्द्र गरेर कुल मतदाता २ सय ५२ जना मतदाता रहेका छन् ।
