फागुन २१ गतेको प्रतिनिधिसभा निर्वाचनमा किताब बेचेको रकमले चुनाव खर्च व्यवस्थापन गर्ने तयारी रहेको धितालले बताए।
जुम्ला — प्रगतिशील लोकतान्त्रिक पार्टीबाट जुम्लामा उम्मेदवार बनेका मनऋषि धिताल चुनाव खर्च जुटाउन किताब बेचिरहेका छन् ।
फागुन २१ गतेको प्रतिनिधिसभा निर्वाचनमा किताब बेचेको रकमले चुनाव खर्च व्यवस्थापन गर्ने तयारी रहेको धितालले बताए।
अन्य दलका उम्मेदवारहरु विकास निर्माणका एजेण्डा लिएर मतदाताको दैलो गरिरहेका छन् । यसअघि पत्रकारितामा रहेका धिताल मतदाताको किताब बेच्दै घरदैलो गरिरहेका छन् । उनले भने, ‘चुनाव खर्च जुटाउन किताब बेचिरहेको छु । मैले किताब मात्र बेचिरहेको छैन्, विचार र ईतिहासको समेत अध्ययन गर्ने अवसर प्रदान गरिरहेको छु ।’
उनले २०८० सालमा ८ वटा पुस्तक प्रकाशन गरेका थिए । उनले ती पुस्तकको बण्डल नै बेचिरहेका छन् । प्रतिबण्डल पाँच हजार रुपैयाँसम्ममा बेच्ने गरेको धितालले बताए । उनले भने, ‘केहीले पाँच हजारमा लिइरहेका छन् त केहीले चुनाव खर्चमा सहयोग गर्ने भन्दै रकम थपिरहेका छन् ।’
उनले जुम्लाका हरेक बस्तीसम्म आफ्ना किताब पुर्याउने लक्ष्य राखेको बताए । जुम्ला सधैं परिवर्तनको पक्षमा रहेको समेत धितातले बताए । ‘जुम्ला विचारसहितको विकल्पको पक्षमा छ,’ धितालले थपे, ‘जुम्ली जनताको सल्लाह र आदेश अनुसार चुनावको मैदानमा होमिएका छौं ।’
लोकतन्त्रको उच्चतम विधि चुनाव भएकोले सबैले जिम्मेवार भएर प्रस्तुत हुनुपर्ने तर्क उनको छ । जुम्लामा १० जना उम्मेदवार प्रतिस्पर्धामा छन्। उनीसहिते सिंजा क्षेत्रबाटै पाँच जना उम्मेदवार भएकोले चुनावी प्रतिस्पर्धा निकै रोचक देखिएको छ ।
