जुम्ला — सडक डिभिजन कार्यालय जुम्लाले डोजर लगाएर नाग्म गमगडी सडक खुलाएको छ ।

नाग्म गमगडी सडक खण्डको सातमाड क्षेत्रमा डेढ फिट भन्दा धेरै हिउँ जमेको थियो । जसले साना ठूला सवारीसाधन आवतजावतमा कठिनाइ थियो । 

मुगुबासी सहजै रुपमा सवारी यात्रा गर्न नपाउँदा हिउँमै पैदल हिँड्न बाध्य थिए । मुगुका प्रमुख जिल्ला अधिकारी खडानन्द खत्रीले झण्डै तीन किलोमिटर सडक खण्डमा जमेको हिउँ डोजरले हटाएको बताए ।

उनले भने, ‘हिउँ पन्छाउन मुगुमा डोजर खोज्यौं तर भेटिएन । सडक डिभिजन कार्यालयसँग समन्वय गरेर जुम्लाबाटै डोजर मगाएर सडक खुलाउँदै अघि बढेको हो ।’

उनका अनुसार अहिले ठूला गाडीहरु चल्न समस्या छ । तर साना सवारी निर्वाध रुपमा चलिरहेका छन् । ‘केही ठुला गाडीहरु डोजरले तानेरै जुम्ला पठायौं,’ प्रमुख जिल्ला अधिकारी खत्रीले भने, ‘अहिले पूर्णरुपमा सडकमा जमेको हिउँ हटाइसकेकोले खासै समस्या छैन ।’

सडकमा बाक्लो हिउँ जमेका कारण नाग्म गमगडी सडक दुईदिन बन्द थियो । सडक डिभिजन कार्यालयले माघ ११ गते आंशिक रुपमा सडक खुलेपछि १२ गतेदेखि पूर्ण रुपमा सडक खुलेको जानकारी दिएको छ । सडक यातायात खुलेसँगै सडक पूर्णरुपमा सुचारु भएको समेत सडक डिभिजन कार्यालयको भनाइ छ ।