कालीकोट — बिहीबार राति कालीकोटको पलाता–४ रिज्यूलेखस्थित भेडीगोठमा आगलागी हुँदा ४५ भेडा मरेका छन् । आगलागीमा परी भेडाधनी घाइते भएका छन् ।

राति ८ बजेतिर पलाता–३ का ४९ वर्षीय कृष्णलाल रोकायाको गोठमा आगलागी भएको हो। कृष्णलालले गएको मंसिरदेखि वनमा चराउन लगिएका भेडा स्थानीय कुम्भ बुढाको खरले छाएको गोठमा राख्दै आएका थिए ।

माघे संक्रान्तिको राति खाना पकाउने क्रममा गोठमा आगलागी हुँदा भेडाधनी कृष्णलाल जलेर घाइते भएको र उनका ५५ मध्ये ४५ वटा भेडा मरेको कालीकोटका प्रहरी प्रमुख डिएसपी हिमबहादुर खत्रीले बताए। ‘खरले छाएको सल्किएको आगो निभाउन खोज्दा भेडाधनी रोकाया घाइते भएका छन्,’ डिएसपी खत्रीले भने।

उनका दुवै खुट्टा र ढाड जलेको भए पनि अवस्था खतरामुक्त छ । गाउँमै प्राथमिक उपचारपछि धौलागोह स्वास्थ्य चौकी लगिएको छ। आगलागीमा घाइते भएका रोकायाका १९ वर्षीय छोरा धीरेन्द्र साथमा भए पनि उनी बाहिर निस्कन सफल भएकाले सकुशल छन्।