सल्यान — सल्यानको कालिमाटीमा सातामा तीन जनाको ज्यान लिएर आतंक मच्चाइरहेको बाघलाई पक्रन वा मार्न आदेश जारी गरिएको छ ।

बाघले सर्वसाधारणको ज्यान उच्च जोखिममा परेपछि जिल्ला सुरक्षा समितिका पदाधिकारीसँगको छलफलपछि नरभक्षी बाघ पक्रन तथा मार्न आदेश जारी गरिएको हो। 

बाँके राष्ट्रिय निकुञ्जबाट निस्केको नरभक्षी बाघले सल्यानको कालिमाटी गाउँपालिका ७ घुईयाबारी र सुर्खेतको सिमानामा पर्ने गेरुवानीमा पुस २३ गते घाँस काटन घरनजिकैको जंगलमा गएका सुर्खेतको भेरीगंगा नगरपालिका ५ गेरुवानीकी ५७ वर्षीया गंगादेवी सारुमगरको ज्यान लिएको थियो। 

पुस २५ गते दाउरा लिन घरनजिकै जंगलमा गएकी सल्यानको कालिमाटी गाउँपालिका ७ की ४२ वर्षीया धनसरी रावत र २८ गते घट्टबाट घर फर्कँदै गरेका वडा ६ को हात्तीढुंगाका ६५ वर्षीय चन्द्रबहादुर खप्तडीको ज्यान लिएको थियो । त्यत्ति मात्र नभई बाघले स्थानीयको चौपाया समेत मारेको थियो । 

बाघले आतंक मच्चाएपछि कालिमाटी गाउँपालिका ५, ६ र ७ का स्थानीय घरबाट बाहिर समेत निस्कन समेत डराएका छन्।

स्थानीयको ज्यान जोखिममा परेपछि वडा कार्यालय र कालिमाटी गाउँपालिकाले मान्छे मार्ने बाघलाई मार्न सिफारिस गरेको थियो। पालिकाले सिफारिस गरेपछि सुरक्षा समिति अनौपचारिक छलफलपछि बाँके राष्ट्रिय निकुन्जलाई पत्राचार गर्दै आदेश कार्यान्वयनका लागि अनुरोध गरिएको थियो ।