रुकुम पश्चिम — मुसिकोट नगरपालिकाको मुख्य बजार क्षेत्र सल्ले, खलंगा, बागबजार र सेरिगाउँबाट जम्मा हुने फोहोर फाल्न मुसिकोट–२ सतिपोले र आसपासका स्थानीयले अवरोध गरेका छन् । स्थानीयको अवरोधपछि बजारका घर–घरमा फोहोर थुप्रिँदै जान थालेको छ ।

गत पुस २१ गतेबाट फोहोर फाल्न नदिने भन्दै त्यहाँसम्म जाने बाटो नै भत्काइदिएको स्थानीय रमेश खड्काले बताए ।

‘विगत १३ वर्षदेखि यहाँ बजारको फोहोर फाल्न लागिएको हो । हामीले पटक–पटक यसो नगर्न अनुरोध गर्‍यौं तर सुनुवाइ नै भएन । हरेक दिन ट्रकका ट्रक फोहोर ल्याएर फाल्ने र जलाउने गर्नाले गाउँ नै दुर्गन्धित भयो । यसकारण अवरोध गरेका हौं,’ उनले भने, ‘विगतमा विभिन्न बहाना–बाजी गरेर फोहोर फालियो तर अब हामी कुनै पनि हालतमा यसो हुन दिन्नौं । यसको विकल्प नगरपालिकाले खोज्नैपर्छ ।’ 

हाल फोहोर फालिरहेको स्थानलाई जीप पार्क बनाउने भनेर डीपीआर गरिएको स्मरण गर्दै खड्काले योजनाअनुसारको काम हुनुपर्ने समेत माग गरे । 

स्थानीयको अवरोधपश्चात् विगत आठ दिनदेखि बजारको फोहोर उठ्न सकेको छैन । जसका कारण मुस्किल परिरहेको खलंगा बजारका व्यवसायी शिव श्रेष्ठले बताए । ‘फोहोर लिने गाडी नै आउन छोड्यो । फोहोर फाल्न रोकेका कारण यस्तो भएको भन्ने सुनिएको छ । भए–भरको फोहोरजति घरमै थुपारेका छौं,’ उनले भने ।