जुम्ला — आगामी फागुन २१ गते हुने प्रतिनिधिसभा सदस्य निर्वाचनका लागि जुम्लामा तोकिएका मतदानस्थलको अनुगमन तीब्र पारिएको छ।

मतदानस्थलको भौगोलिक अवस्था र सुरक्षा चुनौतिको अध्ययन गर्न थालिएको हो। जिल्ला सुरक्षा समितिको संयोजक समेत रहेका प्रमुख जिल्ला अधिकारी दीपक पौडेलको नेतृत्वमा अहिले मतदानस्थलहरुको अनुगमन भइरहेको छ।

टोलीमा सशस्त्र प्रहरी बलका एसपी निलकमल आचार्य, जिल्ला प्रहरी जुम्लाका प्रमुख डिएसपी रबिनबाबु रेग्मी र निर्वाचन कार्यालय जुम्लाका निमित्त प्रमुख नारायणी चौलागाई रहेका छन् । जिल्लाका आठ स्थानीय तहका सबै मतदानस्थलको अनुगमन गरिने निर्वाचन कार्यालयले जनाएको छ।

भौगोलिक रुपमा विकट र सुरक्षा चुनौति देखिएका मतदानस्थलहरुमा प्राथमिकताका साथ अनुगमन गरिएको छ। मतदानस्थलको धमाधम अनुगमन गर्न थालेपछि गाउँबस्तीमा निर्वाचनको माहोल समेत बढ्दै गइरहेको छ। 

हाल जुम्लामा २ अस्थायीसहित ८५ मतदानस्थल छन्। ११० मतदान केन्द्र तोकिएको निर्वाचन कार्यालयको भनाइ छ । टोलीले मतदानस्थलको वर्गीकरण गरेर सुरक्षा योजना बनाउने छ । डिएसपी रेग्मीका अनुसार जिल्लाका ५२ वटा मतदानस्थल अति संवेदनशील छन्। १८ वटा मतदानस्थल संवेदनशील र १५ वटा मतदानस्थल सामान्य रहेका छन्।