हरेक तीन महिनामा गाउँपालिकाले बस्तीमै पुगेर भत्ता वितरण गर्ने गरेको प्रमुख प्रशासकीय अधिकृत डिनायक घर्तीले बताए ।
सुर्खेत — सुर्खेतको लेकबेसी नगरपालिका-७ लमनामा बस्दै आएका राउटे समुदायले तीन महिनाको सामाजिक सुरक्षा भत्ता पाएका छन् । गुराँस गाउँपालिकाले शनिबार बस्तीमै पुगेर १ सय ३७ जनालाई भत्ता वितरण गरेको हो ।
गुराँस गाउँपालिका अध्यक्ष, उपाध्यक्ष र लेकवेसी नगरपालिकाका प्रमुख र उपप्रमुखको टोली बस्तीमै पुगेर भत्ता वितरण गरेको हो । हरेक तीन महिनामा गाउँपालिकाले बस्तीमै पुगेर भत्ता वितरण गर्ने गरेको प्रमुख प्रशासकीय अधिकृत डिनायक घर्तीले बताए । उनका अनुसार तीन महिनाको प्रतिव्यक्ति १२ हजारका दरले सामाजिक सुरक्षा भत्ता वितरण गरिएको छ।
माघी मनाउने तयारीमा रहेका राउटेलाई भत्ताले माघीको किनमेलमा सहयोग हुने उनको भनाइ छ । राउटे समुदाय गुराँस गाउँपालिका-८ का नागरिक हुन् ।
२०७५ सालमा गुराँस गाउँपालिकाले परिचयपत्र उपलब्ध गराएकाले सामाजिक सुरक्षाको रकम जुन ठाउँमा बसोबास गरे पनि गुराँस गाउँपालिकाले नै वितरण गर्दै आएको छ ।
