विद्यार्थीले भीरको बाटो जोखिमपूर्ण यात्रा गर्नु परिरहेकाले रेलिङसहित ढलान गरेर पदमार्ग निर्माण भइरहेको क्याम्पस प्रमुख रुद्रप्रसाद सापकोटाले बताए। ‘क्याम्पस संचालन भएको २० वर्षपछि बल्ल सुरक्षित बाटोमा हिँड्न पाइने भयो,’ उनले भने, ‘अब आउजाउ गर्न सजिलो हुनेछ ।’

उनका अनुसार क्याम्पसबाट फर्किने क्रममा यसअघि लडेर २ जना विद्यार्थीको खुट्टा भाँचिएको थियो। स्नातक तहदेखि स्नाकोत्तरसम्म शिक्षा र व्यवस्थापन संकाय पठनपाठ्न हुने क्याम्पसमा ५ सय बढी विद्यार्थी छन्। 
घुमाउरो बाटो आउजाउ गर्दा बढी समय लाग्ने भएकाले ३ किमि छोटो पैदलमार्ग निर्माण गर्न थालिएको स्ववियू सभापति हिक्मत सिंहले बताए।

चौथादेखि क्याम्पससम्म २ दशमलव ३ किलोमिटर पैदलमार्ग निर्माण गर्न १४ लाख ५५ हजार डिभिजन वन कार्यालयले वेहोर्ने छ भने ३ लाख ८२ हजार ३ सय ५ रुपैयाँ बराबर जनसहभागिता हुने गरी निर्माण सम्झौता गरिएको डिभिजन वन प्रमुख धर्मराज उपाध्यायले बताए। उनका अनुसार क्याम्पस जाने पैदलमार्गमा ढुंगा सोलिङ गरेर ढलान, मेसिनरी वाल र बाटो तल्लो भागको भीरतिर फलामे रेलिङनिर्माण हुनेछ ।