जुम्ला — जुम्लाको एकमात्र नगरपालिका चन्दननाथ नगरपालिकाले सडक बत्ती जडान गरेपछि खलंगा झलमल्ल भएको छ । अहिले रात्रिकालीन समयमा हिँड्डुल गर्न सहज हुनुका साथै अँध्यारोमा हुने सबै प्रकारका विकृति न्यूनीकरणमा टेवा पुगेको छ ।

चन्दननाथ नगरपालिकाका इन्जिनियर लोकेन्द्र महतले अहिले खलंगा बजारलाई केन्द्रित गर्दै २ सय सडक बत्ती जडान गरिएको बताए । ‘अहिले चोरी तथा आपराधिक क्रियाकलाप बढ्दै गइरहेका छन् । ती सबै रोक्न खलंगाका गल्ली, चोक र सार्वजनिक स्थानमा सडक बत्ती जोडिएको हो,’ महतले भने । 

‘चन्दननाथ नगरपालिकामा १० वडा छन् । पहिलो चरणमा सदरमुकाम खलंगा क्षेत्रमा सडक बत्ती जोडिएको हो,’ नगर प्रमुख राजुसिंह कठायतले भने, ‘अहिले धमाधम सडक बत्ती बालिएको अवस्था छ । असारसम्म सबै स्थानमा सडक बत्तीको व्यवस्थापन हुनेछ ।’

सडक बत्तीका लागि ४ हजार मिटर केबुल तार विस्तार गरिएको छ । हरेक सडक बत्तीमा ५० वाटको बल्ब राखिएको छ । नगरपालिकाले एउटा पोलमा दुईवटा बत्ती, जडान खर्च र तार गरेर १७ लाख ५० हजार रुपैयाँ लगानी गरेको छ । 

बजार क्षेत्रमा सडक बत्तीको प्रभावकारिता, दिगोपन परीक्षण गर्दै बस्ती स्तरसम्म लैजाने तयारी नगरपालिकाको छ । अर्को आर्थिक वर्षसम्म जहाँजहाँ सडक पुगेको छ, त्यहीँ त्यहीँ सडक बत्ती जडान गर्ने लक्ष्य रहेको छ । सडक बत्ती जडानले रात्रिकालीन समयमा हुने सबै प्रकारका विकृति रोक्न सहयोग पुगेको स्थानीय अर्जुन बुढाले जानकारी दिए । 

उनले भने, ‘यसभन्दा अघि चोरीका घटना धेरै बढे । अब चोरी डकैती रोकिनेछन । चोरहरूलाई निगरानी गर्न सहज हुनेछ ।’ हिउँदमा चिसो हुने भएकोले चोरीका घटनाहरू बढिरहेका छन,बुढाले भने, ‘सडक बत्ति जाडेर सुरक्षाकर्मीलाई समेत निगरानी गर्न सहज छ ।’