सुर्खेत — साउथ एसियन स्कालर्स एकेडेमी सुर्खेतले आइएसओ २१००१ प्राप्त गरेको छ । ग्रीनबीच विश्वविद्यालय लण्डनद्वारा यो उपाधि पाउने पश्चिम नेपालकै साउथ एसियन स्कालर्स एकेडेमी पहिलो विद्यालय हो ।

शुक्रबार आयोजित कार्यक्रममा अन्तर्राष्ट्रिय व्यवस्थापन प्रणाली मानक (इएमओएस) का प्रतिनिधिहरुले सुर्खेत पुगेर २१००१ को प्रमाणपत्र विद्यालयलाई हस्तान्तरण गरेका हुन् ।

विद्यालयका प्रिन्सिपल छत्र बढुवालले इएमओएसका सम्पूर्ण मापदण्ड पूरा गरिएपछि आइएसओ प्रमाणपत्र प्राप्त भएको बताए । उनले भने, ‘गुणस्तरीय शिक्षा, उत्कृष्ट व्यवस्थापन र नतिजाका कारण हामीले यो उपाधि प्राप्त गरेका हौं ।’ 

शैक्षिक सेवाहरूको गुणस्तरमा वृद्धि, विद्यार्थी, शिक्षक र व्यवस्थापकबीचको सम्वन्ध सुधार, विद्यालयको विश्वसनीयतामा वृद्धि, समावेशी र समान शिक्षा र नवीनता र दीर्घकालीन सफलतालाई प्रोत्साहन गर्न आइएसओले आफूहरुलाई प्रेरणा मिलेको उनले बताए ।