कालिकोट — कालिकोटको नरहरिनाथ-६ माल्कोटमा घरबाट विद्यालय जाने क्रममा लडेर एक बालकको मृत्यु भएको छ ।

नन्दादेवी मावि सेरापाटामा कक्षा-८ मा पढ्ने १४ वर्षीय बालक आयुष विश्वकर्माको घरबाट विद्यालय जानेक्रममा बिहीवार बिहान लडेर मृत्यु भएको जिल्ला प्रहरी कार्यालय कालीकोटका प्रहरी निरिक्षक गणेश ज्ञवालीले बताए ।

'घरबाट बिहान साढे ८ बजेतिर विद्यालय जान हिडेका रहेछन्,' घटनास्थल पुगेर फर्किएका प्रहरी निरिक्षक ज्ञवालीले भने, 'बाटोमा चिप्लिएर लड्दा ढुंगामा बजारिएर मृत्यु भएको हो।' 

उनका अनुसार बिहान ९ बजेदेखि १० बजेसम्म ट्युसन पढ्ने र १० बजेदेखि कक्षामा पढ्ने भनेर घरबाट साढे ८ बजे नै हिँडेका विश्वकर्माको एक हातले किताब समातेको र अर्को हात चिसोका कारण खल्तीमा राखेकाले अल्झिएर लडेको हुनसक्ने अनुमान छ।