जुम्ला — आगामी फागुन २१ गते हुने प्रतिनिधिसभा निर्वाचनको लागि उम्मेदवार छनोट गर्न मंसिर २४ गतेदेखि निरन्तर बैठक बसे पनि जुम्ला कांग्रेसले छनोट गर्न सकेको छैन ।

चार दिनको निरन्तर छलफलपछि पनि उम्मेदवार छनोट गर्न नसकेको कांग्रेस जुम्लाका प्रवक्ता मेघराज गिरी*ले जानकारी दिए । ‘सामान्य छलफल धेरै भइसक्यो तर आधिकारिक निर्णय भएर सिफारीस गर्नेसम्मको निर्णय हुन सकिरहेको छैन,’ प्रवक्ता देवकाटाले भने, ‘अन्तिम टुंगो लगाउने प्रयास भइरहेको छ ।’ 

प्रत्यक्षतर्फको उम्मेदवारमा ७ जनाले दाबी गरेकोमा तीन जनामा झरेको छ । अहिले पूर्व सांसद कान्तिका सेजुवाल, कांग्रेस सभापति कर्णबहादुर शाही र पूर्व उपसभापति खड्कबहादुर सेजुवालको नाममा छलफल चलिरहेको छ । प्रत्यक्षमा पनि उम्मेदवार घटाउने विषयमा छलफल भइरहेको प्रवक्ता गिरीले बताए ।

उनका अनुसार समानुपातिकमा सबैभन्दा धेरै १५ जनाले दाबी गरेका छन् । समानुपातिकमा धनबहादुर बस्नेतको नाम मात्र सिफारिस हुनुपर्ने संस्थापन इतर पक्षको अडान कायमै छ । समानुपातिकमा धेरै आंकाक्षी भएकोले उम्मेदवार छनोटमा सकस भएको बताइएको हो । 

राष्ट्रियसभामा पूर्वराज्यमन्त्री भक्तबहादुर रोकाया र कांग्रेस कर्णाली प्रदेश सभापति ललितजंग शाहीको नाम सिफारीस गर्ने तयारी भए पनि अन्य एकजनाको नाम मात्रै सिफारिस गर्नुपर्नेमा जोड दिइएको छ । संस्थापन इतर पक्षले भक्तबहादुर रोकायाको एकल नाम सिफारीस गर्नुपर्ने अडान कायमै राखेको छ ।