जुम्ला — कांग्रेस हुम्लाले आगामी फागुन २१ गते हुने प्रतिनिधिसभा निर्वाचनका लागि प्रत्यक्षतर्फ तीन जना उम्मेदवारको नाम सिफारिस गरेको छ । बैठकले माघ ११ गते हुने राष्ट्रिय सभा सदस्य निर्वाचनका लागिसमेत उम्मेदवार सिफारिस गरेको हो ।

यही मंसिर २५ गतेको बैठकले उम्मेदवार छनौटको निर्णय गरेर कर्णाली प्रदेश कार्यसमिति हुँदै केन्द्रीय कार्यालय सानेपामा सिफारिस गरेर पठाइएको पार्टी जिल्ला सभापति मोहनबिक्रम सिंहले जानकारी दिए । उनका अनुसार प्रत्यक्षतर्फको उम्मेदवारमा कर्णाली प्रदेशका पूर्वमुख्यमन्त्री जीवनबहादुर शाही, जयपति रावल र रीता शाहीको नाम सिफारिस गरेको छ । 

कांग्रेसले बहालवाला जनप्रतिनिधिलाई उम्मेदवारको रुपमा सिफारिस नगर्ने निर्देशन गरेको भए पनि पार्टी जिल्ला समिति, भ्रातृसंगठनहरु, महासमिति सदस्य, केन्द्रीय तथा प्रदेश महाधिवेशन प्रतिनिधि, जिल्ला कार्यसमितिका पूर्वपदाधिकारी, जनप्रतिनिधि, क्षेत्रीय कार्यसमिति र सात गाउँपालिकाका ४४ वटै वडा इकाइ समितिले जीवनबहादुर शाहीको नाम सिफारिस गर्नुपर्नेमा जोड दिएका थिए । नेता कार्यकर्ताहरुको सामूहिक भावना र आग्रहअनुसार कर्णाली प्रदेशसभा सदस्यसमेत रहेका शाहीको नाम उम्मेदवारका रुपमा सिफारिस गरिएको हो ।