जुम्ला — स्थापना भएको १४ वर्षपछि प्रहरी चौकी गोठिज्युलाको आफ्नै भवन बनेको छ । स्थानीयले निःशुल्क रूपमा जग्गा उपलब्ध गराएपछि प्रहरीको आन्तरिक स्रोतबाट सुविधा सम्पन्न प्रहरी चौकीको भवन बनेको हो ।

प्रहरी नायब महानिरीक्षक माधवप्रसाद श्रेष्ठले बुधवार रिबन काटेर भवनको उद्घाटन गरे । प्रहरी नायब उपरीक्षक श्रेष्ठले निर्धक्क भएर जनताको जिउधनको सुरक्षामा लाग्न निर्देशन दिए ।

प्रहरी चौकी गोठिज्युला २०६८ सालमा स्थापना भएको थियो । '१४ वर्षसम्म प्रहरी चौकी भाडाको घरमा बस्यो,' जुम्ला प्रहरी प्रमुख डीएसपी रविनबाबु रेग्मीले भने, ‘अब आफ्नै पक्की भवनबाट सेवा सुरु भइसकेको छ ।’ कुल ४ करोड १० लाख ३६ हजार रुपैयाँको लागतमा प्रहरी चौकीको भवन निर्माण भएको हो ।

हिरासतसहितको तीन तले पक्की भवन बनाइएको छ । यहाँ गत साउन महिनादेखि नै प्रहरी सरेर नयाँ भवनबाट सेवा दिइरहेको थियो । औपचारिक रूपमा उद्घाटन भने बुधवार मात्र भएको प्रहरी कार्यालयले जनाएको छ ।

जुम्लामा १३ वटा स्थायी प्रहरी चौकी छन् । जसमध्ये प्रहरी चौकी गोठिज्युला, रारालिही र कुडारीमा आफ्नै भवनबाट सेवा दिइरहेको छन् । बाँकी १० वटा प्रहरी चौकी अझैपनि भाडाको घरबाटै चलिरहेका छन् । यो पटक इलाका प्रहरी कार्यालय नराकोट र जिल्ला प्रहरी कार्यालयमा भवन निर्माणको काम हुने डीएसपी रेग्मीले बताए ।