कालीकोटका ९ मध्ये ८ स्थानीय तहको केन्द्रसम्म सडक पुगे पनि महाबै गाउँपालिका कार्यालय पुग्न कर्णाली राजमार्गको सेराबाडाबाट ३ घण्टा हिँड्नु पर्छ ।
कालीकोट — सडक सञ्जालसँग जोडिन नसकेको महाबै गाउँपालिकाको केन्द्र सेराबाडा–पादमघाट सडकका लागि करिब ५१ करोड लागतको ठेक्का लगाउने तयारी भएको छ ।
कर्णाली राजमार्गको सेरावाडादेखि महाबै गाउँपालिकाको केन्द्र पादमघाटसम्मको ६ किलोमिटर सडक निर्माणका लागि विश्व बैंकको सहयोगमा ५१ करोड ३२ लाख ६ हजार ७ सय १९ रुपैयाँको बजेट स्वीकृत भएको हो ।
कालीकोटका ९ मध्ये ८ स्थानीय तहको केन्द्रसम्म सडक पुगे पनि महाबैको केन्द्र पुग्न कर्णाली राजमार्गको सेराबाडाबाट ३ घण्टा हिँड्नु पर्छ । महाबै जोड्न दैलेखबाट सडक निर्माण भइरहे पनि जिल्ला सदरमुकाम जान यातायातको सुविधा छैन ।
महाबै जाने बाटोमा पर्ने तिला नदीमा गत वर्ष पुरानो बेलिब्रिज जडान गरिएको थियो । पादमघाट खोलामा पक्की पुल निर्माणका लागि सडक विभागले ठेक्का लगाएर काम भइरहेको छ ।
गाउँपालिकालाई जिल्ला सदरमुकाम जोड्न विश्व बैकको सहयोगमा प्रादेशिक तथा स्थानीय सडक सुधार कार्यक्रम अर्न्तगत बजेट प्राप्त भएपछि ठेक्का लगाउने तयारी गरिरहेको गाउँपालिका अध्यक्ष खेमबहादुर सिंहले बताए । ‘तिला नदीको सेरावाडामा बेलिब्रिज बनाइसकेका छौं । पादमघाट खोलामा पनि पक्की पुल निर्माणको काम भइरहेको छ,’ उनले भने, ‘अब पालिका केन्द्रसम्म पक्की सडक बन्ने छ ।’
गाउँपालिका उपाध्यक्ष दानसिंह सेजुवालले कर्णाली राजमार्गको सेराबाडामा तिला नदी तरे पछि कडा चट्टान भएकाले विस्फोटक पदार्थ प्रयोग गर्नुपर्ने बताए ।
चालु आवमा कर्णाली प्रदेशको भौतिक योजना तथा सहरी विकास मन्त्रालयको समेत लागत साझेदारी रहने उक्त आयोजनाका लागि प्रदेश सरकारले १० करोड विनियोजन गरेको छ।
