आगलागी गरेको आरोपमा सुर्खेत प्रहरीले वीरेन्द्रनगर–८ बस्ने २८ वर्षिया दीपक कँडेललाई नियन्त्रणमा लिएको हो।
वीरेन्द्रनगर — सुर्खेतको एक अचार पसलमा आगजनी गरेको आरोपमा प्रहरीले एक जनालाई पक्राउ गरेको छ।
कार्तिक ३० गते वीरेन्द्रनगर नगरपालिका–६ सनिहल लाइन स्थित नबदुर्गा बेबी सप र ‘शान्ताको अचार पसल’ मा आगलागी भएको थियो । आगलागी गरेको आरोपमा सुर्खेत प्रहरीले वीरेन्द्रनगर–८ बस्ने २८ वर्षिया दीपक कँडेललाई नियन्त्रणमा लिएको छ ।
श्याम चलाउने र धनबहादुर जीसीले सञ्चालनमा ल्याएको १८ वटा सटर भएको २ तले टिनले छाएको सुपर मार्केटको १ नम्बर सटरमा जुनाकुमारी बोहोराले सञ्चालन गरेको ‘नबदुर्गा बेबी शप’ मा आगलागी भएको थियो । यस्तै, २ नम्बर सटरमा खगिसरा बुढा रोकायले सञ्चालनमा ल्याएको ‘शान्ताको अचार पसल’ समेत आगलागी भएको थियो । आगलागीबाट दुवै पसल जलेर नष्ट भएका थिए ।
आगलागीपछि अनुसन्धान गर्दै जाँदा एक जनालाई पक्राउ गरिएको सुर्खेत प्रहरी प्रवक्ता डीएसपी मोहनजंग बुढाथापाले जानकारी दिए । उनका अनुसार पक्राउ परेकामाथि थप अनुसन्धान भइरहेको छ ।
