नेपाल टेलिकमको इन्टरनेटसहितको फोरजी टावर सञ्चालनमा आएसँगै वर्षौँदेखि सञ्चार सुविधाबाट वञ्चित फोक्सुन्डो ट्रेल, यार्सा पाटनसहित आधा दर्जन बस्तीहरू सञ्चारको पहुँचमा जोडिएका छन् ।
डोल्पा — डोल्पाको ठूलीभेरी नगरपालिका र शे–फोक्सुन्डो गाउँपालिकाका विभिन्न बस्तीहरू सञ्चारको पहुँचमा जोडिएका छन् । वडा नं १० को मिदग्ती लेकमा निर्माण गरिएको नेपाल टेलिकमको इन्टरनेटसहितको फोरजी टावर सञ्चालनमा आएसँगै वर्षौँदेखि सञ्चार सुविधाबाट वञ्चित फोक्सुन्डो ट्रेल, यार्सा पाटनसहित आधा दर्जन बस्तीहरू सञ्चारको पहुँचमा जोडिएका छन् ।
बिहीबार मात्रै टावर सञ्चालनमा आएको दूरसञ्चार कार्यालय डोल्पाका प्राविधिक नवराज भट्टराईले जानकारी दिए । उनका अनुसार टावर सञ्चालनमा आएसँगै दुईवटा स्थानीय तहका रह, परिला, काग्नी, साँङ्टा, छेप्का लगायतका बस्तीहरूमा फोन लाग्नुका साथै इन्टरनेटको पहुँच पनि पुगेको छ ।
रह र परिला गाउँमा मात्रै करिब पाँच सय घरधुरीमा सञ्चारको पहुँच पुगेको स्थानीय समाजसेवी नरेन्द्र महतले जानकारी दिए । ‘रह गाउँमा टावरले राम्रो काम गरेको छ । परिलामा सानै फोनले मात्रै घरभित्र काम गर्छ । फोरजी इन्टरनेट पनि चलेको छैन । आसा छ, सुधार होला,’ महतले भने ।
टावर बनेसँगै सुलिगाड स्थित शे–फोक्सुन्डो राष्ट्रिय निकुञ्जको कार्यालय, सैनिक ब्यारेक क्षेत्रमा पनि राम्रो काम गरेको बताइएको छ । फोक्सुन्डो ट्रेलको प्रमुख बस्ती भित्र पर्ने छेप्कामा पनि फोरजी टावरले काम गरेको पर्यटन व्यवसायी नोर्बु लामाले जानकारी दिए ।
‘भित्र सानो फोनमा मात्रै आउँछ । घरबाहिर भने फोन, इन्टरनेट दुवैले राम्रो काम गरेको छ,’ गुरुङले भने । ‘यो हाम्रो लागि खुसीको कुरा हो । अब एउटा टावर छेप्का र रेँची बीचमा राख्न पहल भइरहेको छ,’ उनले थपे ।
रह लेकमा राखिएको टावर सञ्चालनमा आएसँगै फोक्सुन्डो ट्रेलको आधा भू–भाग सञ्चारको पहुँचमा जोडिनुका साथै फोक्सुन्डो ताल घुम्न आउने पर्यटक र स्थानीयका लागि पनि सहज भएको लामाको भनाइ छ ।
त्यति मात्र नभई टावर सञ्चालन पछि भोक्पा, सागबारीलगायतका यार्सागुम्बा पाटनमा पनि सञ्चार सुविधा विस्तार भएको रहका स्थानीयले बताए ।
