काठमाडौँ — मौसममा बदली आएसँगै बुधबारदेखि नै उच्च हिमाली क्षेत्रमा वर्षा र हिमपात भइरहेको छ । पर्यटकका लागि हिमपातले थप रोमाञ्चकता दिए पनि स्थानीय बासिन्दाको दैनिकी भने कष्टकर बनेको छ । 

शे-फोक्सुन्डो गाउँपालिकाका उपाध्यक्ष पेम्मा वाङछेन गुरुङ हिउँ परेर जीवन कष्टकर हुनु सामान्य भए पनि हिमाली भेगको समस्या त्योभन्दा धेरै भएको बताउँछन् । उनमा अनुसार हिउँले अहिले माथिल्लो डोल्पामा आवातजावत ठप्प छ । पशुबस्तुको चरण क्षेत्रले हिउँले ढाकिएको छ । काठ/दाउराको समस्या थपिएको छ । त्यसमाथि स्थानीय सरकारले सेवा दिन पनि सकिरहेको छैन ।

'पानी पर्ने, चिसो हुने, हिउँ परेर बरफ जम्ने हिमाली क्षेत्रको विशेषता हो । यो नयाँनौलो केही होइन । समुद्र सतहदेखि ५/६ हजारसम्मका यहाँ बस्ती छन् । तीन/चार दिनदेखि निरन्तर पानी परेको छ । हिउँ परेको छ । यहाँ नेट चल्दैन । एउटा राम्रो किसिमको फाइबर नेट छैन । टुजी चलाएर बस्नु परेको छ,' गुरुङले भने, 'सानोतिनो कामकाज गर्न पनि सकिरहेका छैनौं । हिउँदे सभा सकिएको छैन । भुक्तानी सेवा दिन सकेको छैन । हामीलाई स्थानीय तह चलाउन गाह्रो भयो ।'